Të gjithëve na pëlqen të udhëtojmë me buxhet të kufizuar, por dy nëna britanike arritën të vizitonin Shqipërinë brenda një dite duke shpenzuar më pak sesa të shkonin në teatër, shkruan Cyann Fielding për tabloidin më të njohur britanik ”The Sun”.
Sipas artikullit, kombinimi i çmimeve të ulëta të biletave ajrore, kostove të përballueshme të ushqimit dhe akomodimit, si dhe bukurive natyrore të vendit, po e kthen Shqipërinë në një prej destinacioneve më tërheqëse për pushime me buxhet të kufizuar.
The Sun thekson se fluturimet direkte nga Mbretëria e Bashkuar drejt Tiranës ose bregdetit shqiptar mund të kushtojnë vetëm 19,99 paund – më pak se një biletë mesatare për një shfaqje në West End. Gazeta e përshkruan Shqipërinë si një “perlë ende të pazbuluar të Mesdheut”, ku vizitorët mund të shijojnë ujëra kristal, ushqim të shkëlqyer dhe mikpritje tradicionale pa shpenzuar shumë.
Sipas artikullit, ky trend tregon se turistët britanikë po kërkojnë gjithnjë e më shumë përvoja të reja përtej destinacioneve klasike si Spanja apo Italia, duke e bërë Shqipërinë një alternativë tërheqëse dhe ekonomike për pushimet e ardhshme.
Në përfundim, The Sun u bën thirrje lexuesve që duan një arratisje të shpejtë dhe me kosto të ulët të “lënë pas pluhurin e Londrës dhe të zbulojnë bregdetin e mrekullueshëm shqiptar, ku dielli dhe deti janë shumë më afër se sa mund të mendojnë”. /Skyweb.al
