Kreu i Lëvizjes BASHKË, Arlind Qori ka denoncuar kushtet në urbanin publik të linjës së Unazës në Tiranë. Në një postim në rrjetet sociale, Qori thekson se ndryshe nga marrëveshja me Bashkinë e kryeqytetit, sipas së cilës kompanitë janë zotuar që kondicioneri të jetë ndezur përherë, realiteti është krejt tjetër.
“Të ka blerë bashkëshortja një bluzë të re. E vesh me qejf dhe nisesh për në punë. Hip në autobusin e Unazës dhe menjëherë ndjen se kondicioneri nuk është ndezur. Në fund të tre stacioneve, kupton se je djersitur sikur të kishe vrapuar 30 minuta.
Kontrata që Bashkia e Tiranës ka lidhur me kompanitë e transportit publik, kërkon që kondicioneri të jetë gjithnjë funksional dhe i ndezur. Po kur ligji bie ndesh me interesat ekonomike të oligarkëve, nuk vlen as sa një kunjë dhëmbësh”, shkruan ai.
Madje, kreu i Lëvizjes Bashkë fton kryeministrin Edi Rama që të përdorë transportin publik dhe të shohë nga afër kushtet e tyre.
“Meqenëse në shtetin tonë pa institucione, punët mund të marrin zgjidhje vetëm nëse i bie rruga andejpari sulltanit, e ftoj Edi Ramën të bëjë diçka që me gjasë nuk e ka bërë prej 30 vjetësh. Të hipë një ditë në autobusët urbanë të Tiranës dhe të vetëdijesohet se ata që hanë kumbulla, rrush e fiq pas kurrizit të tij, janë edhe më të shumtë. Bëhet kërdia gjithandej. Po sulltani ynë sylesh nuk di gjë”, shkruan Qori. /Skyweba.l
