Ndihma shtetërore në Shqipëri gjatë vitit 2025 është përqendruar kryesisht te turizmi, i cili ka përfituar pjesën më të madhe të mbështetjes financiare nga buxheti i shtetit.
Sipas raportit vjetor për ndihmën shtetërore, të miratuar nga qeveria dhe të publikuar në Fletoren Zyrtare, ndihma shtetërore sektoriale arriti në 5.4 miliardë lekë, ose rreth 56.3 milionë euro, duke përbërë 70.1% të totalit të ndihmës së dhënë gjatë vitit 2025.
Pjesa dërrmuese e kësaj shume ka shkuar për sektorin e turizmit. Sipas të dhënave të administratës tatimore, reduktimi i TVSH-së nga 20% në 6% për strukturat akomoduese ka gjeneruar një mbështetje prej 4.58 miliardë lekësh për 943 subjekte përfituese.
Raporti tregon se ndihmë është dhënë edhe për sektorë të tjerë. Transporti hekurudhor ka përfituar 500 milionë lekë, ndërsa 13 ndërmarrje të ujësjellës-kanalizimeve kanë marrë subvencione në vlerën e 350 milionë lekëve.
Mbështetje financiare është ofruar edhe për nxitjen e punësimit dhe vetëpunësimit. Programi i punësimit realizoi 33.3 milionë lekë, duke mbështetur 177 subjekte dhe punësimin e 271 punëkërkuesve. Ndërkohë, programi i vetëpunësimit disbursoi 42.9 milionë lekë për 224 ndërmarrje të reja.
Për formimin nëpërmjet punës dhe praktikat profesionale u shpërndanë rreth 49 milionë lekë, duke kontribuar në punësimin e më shumë se 300 personave të papunë.
Një tjetër pjesë e konsiderueshme e fondeve është orientuar drejt ndërmarrjeve të vogla dhe të mesme, si dhe startup-eve. Skemat për SME-të dhe startup-et kanë shpërndarë rreth 470 milionë lekë, ku grantet për startup-et zënë peshën kryesore me 285 milionë lekë.
Ndërkohë, sektori i sportit ka përfituar 1.33 miliardë lekë ndihmë shtetërore, ndërsa për kulturën janë dhënë 339.8 milionë lekë për financimin e projekteve në art, kulturë dhe trashëgimi kulturore.
Raporti evidenton gjithashtu se ndihma për kërkim, e lidhur me përjashtimet nga TVSH-ja për operacionet hidrokarbure, arriti në 48.9 milionë lekë gjatë vitit 2025.
