Vetëm 24 orë pasi vendosi rritjen e çmimit të naftës me 6 lekë për litër, Bordi i Transparencës ka ndryshuar sërish vendimin, duke e ulur çmimin me të njëjtën vlerë.
Sipas njoftimit të Ministrisë së Financave, duke nisur nga mesdita e sotme, 31 tetor, nafta do të tregtohet me një çmim maksimal prej 212 lekësh për litër, nga 218 lekë që ishte vendosur një ditë më parë.
Ndryshimi vjen pas luhatjeve të forta të çmimeve gjatë tri ditëve të fundit, duke ngritur pikëpyetje mbi qëndrueshmërinë e vendimeve të Bordit.
Më 29 tetor, Bordi vendosi uljen me vetëm 1 lek të çmimit të naftës, duke e çuar në 212 lekë për litër.
Por një ditë më vonë, më 30 tetor, çmimi u rrit menjëherë me 6 lekë, duke arritur në 218 lekë për litër.
Sot, Bordi ka vendosur të anulojë praktikisht të gjithë rritjen e djeshme, duke e rikthyer çmimin e naftës në nivelin e dy ditëve më parë.
Edhe çmimi maksimal i shitjes me shumicë është ulur nga 206 në 200 lekë për litër.
Ndërkohë, benzina nuk ka pësuar ndryshime. Çmimi maksimal i shitjes me pakicë mbetet 179 lekë për litër, ndërsa ai me shumicë 167 lekë.
Sipas Ministrisë së Financave, vendimet e Bordit bazohen në lëvizjet e çmimeve në bursat ndërkombëtare të karburanteve.
Megjithatë, ndryshimi i çmimit të naftës me 6 lekë brenda vetëm 24 orëve tregon paqëndrueshmërinë e tregut, ku konsumatorët përballen me rritje dhe ulje të menjëhershme.
Çmimet e reja hyjnë në fuqi sot, më 31 tetor, në orën 12:00 dhe do të mbeten të vlefshme deri në vendimin e ardhshëm të Bordit të Transparencës.
Vendimet e Bordit përcaktojnë çmimet maksimale të lejuara të tregtimit, ndërsa pikat e karburanteve mund të shesin edhe më lirë. /skyweb.al
