Sulmi ndodhi mbrëmjen e 29 tetorit dhe, sipas hetimeve paraprake, autorët arritën të depërtonin në infrastrukturën teknologjike të kompanisë, duke marrë kontroll mbi procesin e autorizimit të transaksioneve.
Sipas Reuters, gjithçka mund të ketë nisur nga laptopi i komprometuar i një inxhinieri të Binance, përmes të cilit hakerat dyshohet se fituan akses në një prej sistemeve të brendshme.
Pasi siguruan këtë akses, sulmuesit arritën të urdhëronin transferimin e fondeve nga portofolat që Binance përdor për përpunimin e transaksioneve, drejt adresave të kontrolluara prej tyre.
Operacioni u zhvillua me shpejtësi të jashtëzakonshme, ndërsa pjesa dërrmuese e aseteve u transferua brenda rreth 20 minutash, përmes disa rrjeteve blockchain.
Binance pranoi se hetimet e mëvonshme kanë zbuluar edhe pika të tjera depërtimi, duke treguar se sulmi ishte më kompleks sesa dyshohej fillimisht.
Kompania deklaron se nuk ka gjetur prova të komprometimit të çelësave privatë të portofolave dixhitalë.
Sipas kompanive amerikane të analizës së blockchain, TRM Labs dhe Chainalysis, pas operacionit dyshohet se qëndron një grup hakerash i lidhur me Korenë e Veriut.
Ekspertët kanë identifikuar ngjashmëri me sulmin ndaj platformës Bybit në vitin 2025, ku u vodhën rreth 1.5 miliardë dollarë dhe për të cilin FBI-ja fajësoi hakerat koreano-veriorë.
Menjëherë pas zbulimit të sulmit, Binance pezulloi tërheqjet e fondeve dhe nisi bashkëpunimin me autoritetet ligjzbatuese dhe kompanitë e industrisë për gjurmimin e parave.
Deri më tani, rreth 3 miliardë dollarë nga asetet e prekura janë ngrirë përmes ndërhyrjes së kompanive si Tether, Circle, Ripple dhe World Liberty Financial.
Megjithatë, një pjesë e konsiderueshme e kriptomonedhave të transferuara mbetet jashtë kontrollit të kompanisë.
Binance ka garantuar se do të mbulojë humbjet e përdoruesve përmes fondit të emergjencës SAFU dhe rezervave të veta financiare.
Në përditësimin e fundit, kompania deklaroi se ka veçuar mbi 6.34 miliardë dollarë për mbulimin e dëmit, ndërsa po punon për rikthimin e plotë të shërbimeve.
Goditja shkaktoi tronditje edhe në tregjet ndërkombëtare. Bitcoin zbriti në nivelin më të ulët të gjashtë javëve, ndërsa Ethereum dhe BNB regjistruan rënie të forta.
Ngjarja ka rikthyer shqetësimet mbi sigurinë e platformave që administrojnë miliarda dollarë asete dixhitale, duke treguar se edhe sistemet më të mëdha mund të goditen përmes komprometimit të infrastrukturës së brendshme.
Hetimet vijojnë për identifikimin e autorëve dhe përcaktimin e mekanizmit të plotë të sulmit, ndërsa dyshimet për përfshirjen e Koresë së Veriut ende nuk janë konfirmuar zyrtarisht nga autoritetet hetimore. /skyweb.al
