Kryeministri Edi Rama duket se ka vendosur të shkëputë përfundimisht lidhjet politike me Erion Veliajn, duke u kërkuar ministrave dhe drejtuesve socialistë të mos i dalin në mbështetje kryebashkiakut të Tiranës, i cili ndodhet në paraburgim.
Sipas Hashtag.al, gjatë një mbledhjeje të zhvilluar këtë të premte, Rama u ka dhënë një ultimatum të prerë bashkëpunëtorëve të tij, duke i paralajmëruar se askush nuk duhet të guxojë ta mbështesë Veliajn, as drejtpërdrejt dhe as përmes deklaratave publike.
Mesazhi raportohet se ka qenë i qartë: Veliaj nuk duhet të ketë më mbështetje politike brenda qeverisë dhe strukturave drejtuese të socialistëve.
Në këtë kontekst është përmendur edhe Bledi Çuçi, i cili një ditë më parë u përplas me ministrin e Drejtësisë, Toni Gogu, duke kërkuar shpjegime për transferimin e Veliajt nga paraburgimi i Durrësit në burgun e Fierit.
Rama e konsideron tashmë Veliajn një kundërshtar politik, duke e lidhur qëndrimin e tij edhe me protestat e fundit kundër qeverisë.
Në shënjestër të kryeministrit raportohet se ka qenë edhe avokati i Veliajt, Plarent Ndreca, i konsideruar si një prej njerëzve që përfaqësojnë linjën e kryebashkiakut gjatë qëndrimit të tij në paraburgim.
Kjo përplasje vjen në një moment kur transferimi i Veliajt në burgun e Fierit ka shkaktuar debate të forta mes socialistëve. Çuçi dhe Fatmir Xhafaj kanë kërkuar dokumentacionin e transferimit, ndërsa ministri Gogu ka urdhëruar inspektimin e procedurave. /skyweb.al
