Komisioni i Konkurrencës ka përfunduar monitorimin e tregut të shërbimeve bankare përmes pajisjeve ATM në territorin e Bashkisë Sarandë, duke analizuar komisionet e aplikuara nga bankat e nivelit të dytë për tërheqjet në bankomat.
Nisma u ndërmor në zbatim të detyrimeve që rrjedhin nga Rezoluta e Kuvendit të Shqipërisë dhe u mbështet në të dhëna zyrtare të siguruara nga të gjitha bankat e licencuara, sipas listës së publikuar nga Banka e Shqipërisë.
Nga vlerësimi i këtyre të dhënave, Komisioni nuk konstatoi shkelje të drejtpërdrejta të ligjit për mbrojtjen e konkurrencës, por identifikoi disa problematika serioze që ndikojnë negativisht në qartësinë dhe barazinë e tregut:
- Mungesë transparence në tarifat që u komunikohen klientëve, veçanërisht turistëve dhe përdoruesve të huaj;
- Mospërputhje dhe mospërqafim i një qasjeje të harmonizuar në komisionet që u aplikohen kartëmbajtësve të huaj;
- Përdorim problematik i rrjeteve të nënkontraktuara të bankomateve, që shpesh rezultojnë me tarifa më të larta dhe pa informacion të mjaftueshëm për konsumatorin.
Në përgjigje të këtyre gjetjeve, me Vendimin nr. 1193, datë 26 qershor 2025, Komisioni i Konkurrencës i ka adresuar Bankës së Shqipërisë tre rekomandime konkrete:
- Të shqyrtojë metodologjinë e llogaritjes së komisioneve të ATM-ve, përfshirë aplikimin e tarifave shtesë për kartëmbajtësit e huaj dhe përdorimin e shërbimit DCC (këmbimi dinamik i valutës), i cili shpesh përfshin marzhe të larta të fshehura (mark-up);
- Të kërkojë publikimin periodik dhe në mënyrë të unifikuar të të gjitha tarifave të ATM-ve, si në faqet zyrtare të bankave, ashtu edhe në faqen e vet Bankës së Shqipërisë, në një format të qartë dhe të aksesueshëm nga publiku;
- Të shqyrtojë mundësinë e ndërhyrjes rregullatore për përdorimin e rrjeteve të nënkontraktuara të ATM-ve dhe të parandalojë vendosjen e komisioneve disproporcionale që dëmtojnë konsumatorin dhe krijojnë pabarazi në treg.
Ky vendim vjen në një kohë kur Saranda, si një nga destinacionet kryesore turistike të vendit, përballet me fluks të lartë përdoruesish të huaj që mund të jenë më të ekspozuar ndaj tarifave të fshehura apo të pashpjeguara nga bankomatet lokale. Komisioni thekson nevojën për më shumë transparencë dhe mbrojtje të konsumatorëve, veçanërisht në zonat turistike ku mungesa e informacionit mund të çojë në kosto të panevojshme për qytetarët dhe vizitorët./skyweb.al
