Përdorimi i internetit në telefonat celularë vijon të rritet me ritme të shpejta në Shqipëri, ndërsa qytetarët po largohen gjithnjë e më shumë nga komunikimi tradicional përmes telefonatave dhe SMS-ve. Sipas raportit të publikuar nga Autoriteti i Komunikimeve Elektronike dhe Postare, një përdorues aktiv i shërbimeve celulare konsumoi mesatarisht gjatë një muaji në tremujorin e katërt të vitit 2025 rreth 10.98 GB internet, 136 minuta telefonata dalëse dhe 12 SMS.
Krahasuar me të njëjtën periudhë të një viti më parë, konsumi i internetit u rrit me 22.8%, ndërsa përdorimi i telefonatave dhe mesazheve shënoi rënie respektivisht me 6% dhe 9.6%. Të dhënat tregojnë se telefoni celular po përdoret gjithnjë e më shumë për rrjete sociale, komunikim në aplikacione, video dhe transmetim të dhënash, duke zëvendësuar gradualisht format tradicionale të komunikimit.
Gjatë tremujorit të fundit të vitit 2025, trafiku total i internetit në rrjetet celulare arriti në rreth 68 milionë GB, ndërsa volumi i thirrjeve telefonike zbriti në rreth 1 miliard minuta. Edhe numri i SMS-ve të dërguara ra në 87.6 milionë.
Megjithëse tregu ka shënuar rënie të numrit total të kartave SIM, Shqipëria vijon të mbetet mbi mesataren europiane dhe atë botërore për numrin e kartave SIM për banor. Në fund të vitit 2025 rezultonin rreth 3.1 milionë karta SIM aktive, ose rreth 1.3 karta për banor.
Raporti evidenton gjithashtu një ndryshim në mënyrën sesi qytetarët zgjedhin paketat e tyre të komunikimit. Përdoruesit me kontrata paspagimi dhe plane hibride kanë ardhur në rritje, duke arritur në 46.6% të totalit të abonentëve aktivë, që lidhet kryesisht me kërkesën më të lartë për internet dhe paketa me më shumë shërbime.
Rritja e përdorimit të internetit nëpërmjet telefonave celularë evidenton faktin se tashmë telefonat celularë e kanë ridimensionuar rolin e tyre duke kaluar nga përdorimi tradicional për kryerjen e thirrjeve zanore, drejt ofrimit të aksesit të gjerë në botën virtuale (shfletim informacionesh, transmetim të dhënash, kryerje e thirrjeve audio/video, sms, etj.), gjë e cila impakton drejtpërdrejt volumin e të dhënave të transmetuara në shërbimet celulare. /tvscan.al
