Lëvizja pa viza dhe kalimi i shpejtë në kufij vazhdon të mbetet një privilegj i lidhur drejtpërdrejt me fuqinë e pasaportës. Raporti më i fundit i Henley Passport Index për vitin 2026 tregon se pasaportat aziatike kryesojnë renditjen globale.
Singapori renditet në vendin e parë, duke u ofruar qytetarëve të tij akses pa vizë në 192 nga 227 destinacione në botë. Indeksi përpilohet nga kompania britanike Henley & Partners dhe bazohet në të dhëna të Shoqatës Ndërkombëtare të Transportit Ajror.
Në vendin e dytë renditen Japonia dhe Koreja e Jugut, me nga 188 destinacione pa vizë secila.
Europa mban vendin e tretë me pesë shtete: Danimarka, Luksemburgu, Spanja, Suedia dhe Zvicra, të cilat u ofrojnë qytetarëve të tyre hyrje pa vizë në 186 vende.
Tre vende nga Ballkani përfshihen në dhjetëshen e parë për vitin 2026: Greqia, Kroacia dhe Sllovenia, duke konfirmuar pozicionin e fortë të rajonit krahasuar me vitet e mëparshme.
Në vendin e katërt renditen dhjetë shtete europiane, përfshirë Gjermaninë, Francën, Italinë, Holandën dhe Norvegjinë, me akses në 185 destinacione. Vendin e pestë e ndajnë Hungaria, Portugalia, Sllovakia, Sllovenia dhe Emiratet e Bashkuara Arabe me 184 destinacione.
Emiratet, rritja më e fortë historike
Emiratet e Bashkuara Arabe shënojnë performancën më të fortë në historinë 20-vjeçare të indeksit, duke shtuar 149 destinacione pa vizë që nga viti 2006 dhe duke u ngjitur me 57 vende në renditje. Raporti e lidh këtë rritje me diplomacinë aktive dhe liberalizimin e regjimit të vizave.
Rënia e SHBA-ve dhe Mbretërisë së Bashkuar
Shtetet e Bashkuara renditen në vendin e dhjetë me 179 destinacione pa vizë, duke u rikthyer në top-10 pas një rënieje në fund të vitit 2025. Megjithatë, 37 vende i tejkalojnë SHBA-të në renditje, një më shumë se një vit më parë.
Mbretëria e Bashkuar shënon rënien më të madhe vjetore, duke humbur aksesin pa vizë në tetë destinacione dhe duke zbritur në 182 vende.
Shqipëria dhe Kosova mbeten pas rajonit
Në krahasim me fqinjët, Shqipëria dhe Kosova vijojnë të kenë pasaporta më pak të fuqishme. Shqipëria renditet në vendin e 43 me akses pa vizë në 121 destinacione, ndërsa Kosova në vendin e 59 me vetëm 81 destinacione.
Stabiliteti politik dhe besueshmëria diplomatike
Sipas raportit, fuqia e pasaportës lidhet drejtpërdrejt me stabilitetin politik, besueshmërinë ndërkombëtare dhe rolin e shtetit në marrëdhëniet globale. Diferenca mes pasaportës më të fuqishme dhe asaj më të dobët në botë arrin në 168 destinacione.
Në fund të renditjes mbeten Afganistani, Siria dhe Iraku, me akses shumë të kufizuar ndërkombëtar. /skyweb.al
