Eksportet shqiptare shënuan një rritje të fortë në korrik, por përmirësimi nuk po prek të gjithë sektorët njësoj. Materialet e ndërtimit, metalet dhe energjia po mbajnë peshën kryesore të rritjes, ndërsa tekstilet dhe këpucët vijojnë të humbasin terren.
Sipas INSTAT, eksportet e mallrave arritën në 33.7 miliardë lekë, ose 10.6% më shumë se në korrik 2025.
Rritja u mbështet kryesisht nga materialet e ndërtimit dhe metalet, të cilat kontribuuan me 8.9 pikë përqindje, si dhe nga mineralet, lëndët djegëse dhe energjia elektrike, me 5.3 pikë përqindje.
Në kahun tjetër, tekstilet dhe këpucët vijuan rënien, duke ulur rritjen totale të eksporteve me 4.3 pikë përqindje. Edhe produktet kimike dhe plastike dhanë kontribut negativ.
Pra, eksportet shqiptare po rriten, por jo falë industrisë fason, e cila për vite ka qenë një nga sektorët kryesorë eksportues. Rritja aktuale po vjen kryesisht nga metalet dhe energjia.
Një tjetër zhvillim i fortë është rritja e importeve nga Kina me 22.7% krahasuar me korrikun e vitit të kaluar. Në të njëjtën kohë, importet nga Gjermania ranë me 9.2% dhe ato nga Greqia me 2.9%.
Importet totale të Shqipërisë arritën në 86.4 miliardë lekë, 3.6% më shumë se një vit më parë. Kjo do të thotë se vendi importoi rreth 2.6 herë më shumë mallra sesa eksportoi.
Deficiti tregtar ishte 52.8 miliardë lekë vetëm në korrik, ndërsa eksportet mbuluan vetëm 39% të importeve.
Krahasuar me qershorin, situata u përkeqësua: eksportet ranë me 5%, importet u rritën me 3.5%, ndërsa deficiti tregtar u zgjerua me 9.8% brenda një muaji.
Në tregjet e eksportit, shitjet shqiptare drejt Greqisë u rritën me 19%, ndërsa ranë drejt Italisë me 2% dhe Kosovës me 2.4%. /skyweb.al
