Policia e Shtetit do të krijojë një njësi të re të posaçme kundër krimeve mjedisore, me fokus te hetimi i zjarreve, dëmtimit të pyjeve dhe veprave të tjera penale që cenojnë mjedisin.
Njoftimi u bë nga ministri i Punëve të Brendshme, Besfort Lamallari, gjatë një takimi me drejtuesit vendorë të Policisë së Shtetit në 12 qarqe, ku ishte i pranishëm edhe drejtori i Përgjithshëm i Policisë, Skënder Hita.
Lamallari kërkoi ndryshim të qasjes së Policisë ndaj zjarreve, duke theksuar se puna nuk duhet të përfundojë me shuarjen e flakëve, por të vazhdojë me hetimin e shkaqeve dhe identifikimin e autorëve të mundshëm.
“Për Policinë, zjarri nuk përfundon kur fiket. Aty fillon pyetja se pse ndodhi, kush e shkaktoi dhe nëse pas tij fshihet një vepër penale”, deklaroi ministri.
Sipas tij, çdo zjarr i dyshimtë duhet të hetohet profesionalisht dhe në bashkëpunim me shërbimin zjarrfikës, Emergjencat Civile, komunitetin dhe Prokurorinë.
Lamallari kërkoi gjithashtu përdorimin më të madh të teknologjisë dhe ekspertizës forenzike, brenda dhe jashtë vendit, për dokumentimin e provave dhe ndjekjen penale të autorëve.
Ministri vuri theksin edhe te dëmi i shkaktuar nga zjarret gjatë këtij viti, veçanërisht në fondin pyjor, duke e cilësuar rikuperimin e sipërfaqeve të djegura si një proces që mund të kërkojë vite apo edhe gjenerata.
Në të njëjtin takim, drejtori i Përgjithshëm i Policisë së Shtetit, Skënder Hita, kërkoi nga drejtuesit vendorë më shumë angazhim në tre fusha: sigurinë publike, sigurinë rrugore dhe sigurinë detare.
Hita kërkoi reagim më të shpejtë ndaj konflikteve dhe shqetësimeve të qytetarëve, ndërsa theksoi se performanca e Policisë nuk matet vetëm me rezultatet operacionale, por edhe me mënyrën e komunikimit dhe sjelljen ndaj publikut.
Krijimi i njësisë së re për krimet mjedisore vjen në një kohë kur zjarret dhe dëmet në pyje janë kthyer në një nga problematikat më të mëdha të sezonit veror. /skyweb.al
