SHBA dhe Irani kanë arritur një marrëveshje paraprake për t’i dhënë fund konfliktit në Lindjen e Mesme, pas negociatave intensive të zhvilluara me ndërmjetësimin e Pakistanit.
Lajmi u bë publik nga kryeministri pakistanez, Shehbaz Sharif, i cili e cilësoi marrëveshjen si një hap të rëndësishëm drejt uljes së tensioneve në rajon.
Sipas tij, marrëveshja parashikon ndërprerjen e menjëhershme të operacioneve ushtarake në të gjitha frontet, përfshirë edhe Libanin, si dhe hapjen e një procesi negociatash brenda 60 ditëve për arritjen e një marrëveshjeje përfundimtare.
Nënshkrimi zyrtar pritet të zhvillohet më 19 qershor në Gjenevë të Zvicrës, ndërsa gjatë ditëve në vijim palët do të zhvillojnë takime teknike për detajet e zbatimit.
Sharif tha se ndërmjetësuesit do të vijojnë konsultimet për të përcaktuar mekanizmat e marrëveshjes dhe për të përgatitur ceremoninë zyrtare të nënshkrimit.
Nga Teherani, zëvendësministri i Jashtëm iranian, Kazem Gharibabadi, konfirmoi se negociatat kanë qenë të gjata dhe intensive. Sipas tij, përfaqësues të Katarit zhvilluan rreth 14 deri në 15 orë bisedime për finalizimin e memorandumit të mirëkuptimit mes Iranit dhe SHBA-së.
Pas njoftimit nga Islamabadi, edhe presidenti amerikan Donald Trump konfirmoi se marrëveshja me Iranin është mbyllur. Ai njoftoi gjithashtu hapjen e plotë të Ngushticës së Hormuzit dhe heqjen e bllokadës detare amerikane ndaj porteve iraniane.
Megjithatë, Trump sqaroi më vonë se këto masa do të hyjnë në fuqi pas nënshkrimit zyrtar të marrëveshjes në Gjenevë.
Sipas tij, hapja e Ngushticës së Hormuzit do të rikthejë qarkullimin normal të naftës në tregjet ndërkombëtare dhe do të ndikojë në stabilizimin e çmimeve.
Në një intervistë për Fox News, zëvendëspresidenti amerikan J.D. Vance tha se planifikon të marrë pjesë në ceremoninë e nënshkrimit në Gjenevë, ndërsa nuk përjashtohet as prania e presidentit Trump.
Autoritetet iraniane bëjnë të ditur se faza tjetër e negociatave do të fokusohet në katër çështje kryesore: heqjen e sanksioneve ndaj Iranit, programin bërthamor iranian, rindërtimin dhe zhvillimin ekonomik të vendit, si dhe ngritjen e një mekanizmi monitorimi për zbatimin e marrëveshjes.
