Çmimet e naftës kanë pësuar rënie të fortë në tregjet ndërkombëtare pas arritjes së marrëveshjes paraprake mes Shteteve të Bashkuara dhe Iranit për t’i dhënë fund konfliktit në Lindjen e Mesme.
Nafta Brent ra me mbi 4 dollarë për fuçi, duke zbritur në rreth 83 dollarë, ndërsa nafta amerikane WTI humbi mbi 4 dollarë për fuçi, duke rënë në rreth 80 dollarë.
Rënia erdhi menjëherë pasi u konfirmua marrëveshja që parashikon hapjen e Ngushticës së Hormuzit dhe rifillimin e qarkullimit normal të eksporteve të naftës nga rajoni.
Tregjet reaguan pozitivisht ndaj lajmit, pasi investitorët vlerësuan se është ulur ndjeshëm rreziku i ndërprerjeve të furnizimit me naftë nga Lindja e Mesme.
Analistët theksojnë se një pjesë e madhe e rritjes së çmimeve gjatë muajve të fundit lidhej me tensionet gjeopolitike dhe bllokimin e trafikut detar në Hormuz.
Ngushtica e Hormuzit konsiderohet një nga arteriet më të rëndësishme energjetike në botë, pasi përmes saj kalon rreth një e pesta e furnizimit global me naftë dhe gaz të lëngshëm.
Mbyllja e saj kishte shkaktuar shqetësime serioze për ekonominë globale dhe kishte ushtruar presion të fortë mbi çmimet e energjisë.
Presidenti amerikan Donald Trump deklaroi se marrëveshja me Iranin do të garantojë rikthimin e lëvizjes normale të anijeve në Hormuz, ndërsa autoritetet iraniane konfirmuan se pas nënshkrimit zyrtar do të nisë një proces negociatash për çështje më të gjera, përfshirë programin bërthamor dhe heqjen e sanksioneve.
Ekspertët paralajmërojnë se, megjithëse tregjet reaguan menjëherë me ulje të çmimeve, stabilizimi i plotë i furnizimeve dhe rikthimi i kapaciteteve të plota të eksportit mund të kërkojë disa muaj.
