Autoriteti Rrugor Shqiptar ka njoftuar se gjatë natës së 13–14 janarit do të ketë bllokim të përkohshëm të qarkullimit në rampën që lidh Tiranën me Rinasin, për shkak të punimeve për ndërtimin e mbikalimit të ri në Qafë Kashar.
Sipas njoftimit zyrtar, bllokimi do të nisë në orën 20:00 të datës 13 janar dhe do të zgjasë deri në orën 06:00 të mëngjesit të 14 janarit. Gjatë këtij intervali, kalimi i mjeteve në drejtimin Tiranë → Rinas nuk do të jetë i mundur.
Për udhëtarët që duhet të lëvizin drejt Aeroportit “Nënë Tereza”, ARRSH ka përcaktuar disa rrugë alternative. Qarkullimi mund të realizohet përmes aksit Vorë – Fushë Krujë, nga kthesa e Rinasit, si dhe përmes rrugës dytësore Tiranë – Kamëz – Valias – Rinas. Një tjetër alternativë është edhe aksi Kashar – Thumanë, i ndërtuar nga koncesionari.
Autoriteti Rrugor Shqiptar u bën thirrje drejtuesve të mjeteve të tregojnë kujdes, të ndjekin sinjalistikën provizore dhe të planifikojnë lëvizjen në kohë, për të shmangur vonesat gjatë orëve të punimeve.
