Mijëra turistë kanë mbetur të bllokuar në Lapland të Finlandës pasi një valë e fortë të ftohti ka ndaluar fluturimet nga një prej aeroporteve të saj.
Nisjet nga aeroporti Kittila i Laplandës, që do të transportonin udhëtarët dimërorë drejt vendeve si Londra, Bristoli, Mançesteri, Parisi dhe Amsterdami, u anuluan të gjitha të dielën, pasi temperaturat nuk u rritën mbi -35°C.
Problemi pritet të vazhdojë edhe të hënën, pasi agjencia meteorologjike e Finlandës ka parashikuar një temperaturë minimale prej -39°C. Fluturimi i parë që duhej të nisej nga Kittila tashmë është anuluar.
I ftohti ekstrem e bën të vështirë çakullimin (heqjen e akullit) e avionëve, ndërsa pajisjet e mirëmbajtjes dhe furnizimit me karburant në tokë mund të ngrijnë. Operatori i aeroportit, Finavia, i tha transmetuesit publik Yle se lagështia në ajër po e përkeqësonte situatën, pasi po krijonte ngricë shumë të rrëshqitshme.
Ndërsa Lapland, shtrihet në veri të Norvegjisë, Suedisë dhe Finlandës, njihet për të ftohtin dhe borën. Zakonisht ka një temperaturë mesatare dimërore prej -14°C, me rënie të herëpashershme deri në -30°C, sipas bordit kombëtar të turizmit.
Aeroporti i Kittilës shërben kryesisht për njerëzit që udhëtojnë drejt resorteve të skive aty pranë dhe për të parë Dritat Veriore, ndërsa aeroporti i Rovaniemit, më në jug, është destinacioni “zyrtar” për vizitorët e shtëpisë folklorike të Santa Klausit.
Të hënën, fluturimi i parë lokal që duhej të mbërrinte në Kittila u anulua, ndërsa fluturimet ndërkombëtare u vonuan.
Moti i ftohtë i ka bërë rrugët veçanërisht të rrezikshme, me Fintraffic që ka paralajmëruar për kushte shumë të akullta në rajon.
Një autobus me pasagjerë ukrainas doli nga rruga dhe përfundoi në një kanal të dielën në mëngjes, raportoi Yle duke cituar policinë lokale. Sipas raportimeve, nuk pati të lënduar seriozë.
Të ftohtit e pazakontë në Laplandë vjen në një kohë kur një stuhi që po kalon mbi Evropën Veriore ka sjellë kushte dimërore dhe ndërprerje udhëtimesh në Mbretërinë e Bashkuar, Francë dhe Gjermani. /skyweb.al
