Shqipëria shënon një tjetër hap përpara në zhvillimin e infrastrukturës digjitale, falë rezultateve të One Albania, renditur mes operatorëve që kanë shënuar progresin më të lartë në disa prej treguesve kryesorë të eksperiencës 5G.
One Albania është renditur mes kompanive “5G Global Rising Star” nga Opensignal, një prej kompanive të njohura ndërkombëtare për matjen e eksperiencës reale të përdoruesve në rrjetet celulare.
Vlerësimi merr rëndësi të veçantë pasi 5G në Shqipëri është ende një teknologji e re. Frekuencat në brezin 3.5 GHz iu dhanë operatorëve vetëm në nëntor 2024.
Që prej nisjes së 5G-së, One Albania ka ndërmarrë një program të gjerë modernizimi të rrjetit. Në janar 2025, kompania dhe grupi 4iG njoftuan një investim prej mbi 50 milionë eurosh, në bashkëpunim me Ericsson, për pajisjet dhe zhvillimin e rrjetit të ri, përfshirë teknologjinë 5G Standalone. Rezultatet e fundit të Opensignal tregojnë se ky investim po shoqërohet tashmë me përmirësim të matshëm të eksperiencës së përdoruesve.
One Albania është klasifikuar si “5G Global Rising Star” në tri elemente të rëndësishme të funksionimit të rrjetit: Besueshmëria, eksperienca në gaming dhe komunikimi përmes aplikacioneve zanore.
Rezultati më i lartë është regjistruar te 5G Reliability, treguesi që mat sa e qëndrueshme dhe e besueshme është lidhja gjatë përdorimit të përditshëm.
One Albania ka shënuar një rritje prej 121.8 pikësh. Ky është rezultati më i lartë mes operatorëve të përfshirë në këtë renditje në grupin e tregjeve me sipërfaqe nën 200 mijë kilometra katrorë.
Edhe në kategorinë 5G Games Experience, One Albania renditet e dyta për përmirësimin vjetor, me 10.5 pikë më shumë. Ky tregues mat reagimin dhe qëndrueshmërinë e rrjetit gjatë përdorimit të aplikacioneve që kërkojnë komunikim të shpejtë dhe vonesa minimale.
Elementi i tretë është 5G Voice App Experience, ku One Albania ka përmirësuar rezultatin me 4.1 pikë, duke u renditur e dyta në grupin e saj. Treguesi mat cilësinë e komunikimit përmes aplikacioneve si WhatsApp, FaceTime dhe Telegram, duke vlerësuar vonesat, ndërprerjet dhe cilësinë e zërit.
Përmirësim është regjistruar edhe te mbulimi. One Albania ka fituar 1.5 pikë në 5G Coverage Experience, duke u renditur mes 15 operatorëve me rritjen më të madhe në tregjet me sipërfaqe nën 200 mijë kilometra katrorë.
Për Shqipërinë, rezultatet mbartin një rëndësi që shkon përtej renditjes së një operatori. Ato tregojnë se investimet e viteve të fundit në 5G po fillojnë të reflektohen në cilësinë reale të infrastrukturës së telekomunikacionit që përdorin qytetarët dhe bizneset.
Vlerësimi i Opensignal përbën një konfirmim të pavarur ndërkombëtar të përmirësimit të rrjetit të One Albania, veçanërisht në një nga elementet më të rëndësishme për të ardhmen e 5G-së: Besueshmërinë dhe qëndrueshmërinë e lidhjes.
Raporti ka analizuar miliarda matje të eksperiencës reale të përdoruesve, të mbledhura nga 1 janari deri më 29 qershor 2026. Për të bërë krahasime më të drejta, operatorët janë ndarë sipas sipërfaqes së vendeve ku operojnë.
Shqipëria është pjesë e grupit të tregjeve nën 200 mijë kilometra katrorë, së bashku me vende si Austria, Belgjika, Danimarka, Holanda, Zvicra, Koreja e Jugut dhe Singapori. Në këtë mënyrë, rezultatet e Opensignal konfirmojnë se 5G në Shqipëri nuk po zgjerohet vetëm në mbulim, por po përmirësohet edhe në besueshmëri dhe në eksperiencën konkrete që merr përdoruesi. /skyweb.al
