Aeroporti Ndërkombëtar i Tiranës ka konsoliduar pozitat si më i madhi në Ballkanin Perëndimor, jo vetëm për numrin e pasagjerëve, por edhe për gamën e destinacioneve dhe bashkëpunimeve me linjat ajrore.
Sipas të dhënave zyrtare, gjatë periudhës janar–korrik 2025, mbi 360 mijë pasagjerë nga Kosova, Mali i Zi dhe Maqedonia e Veriut kanë zgjedhur Rinasin për të udhëtuar drejt destinacioneve direkte në Europë dhe Lindjen e Mesme.
Një rritje e ndjeshme është regjistruar veçanërisht nga Maqedonia e Veriut, ku përmirësimi i infrastrukturës rrugore ka lehtësuar ndjeshëm qasjen drejt aeroportit, duke bërë që gjithnjë e më shumë qytetarë të vendit fqinj ta përdorin Rinasin si pikë nisjeje.
Këto shifra e konfirmojnë edhe një herë trendin në rritje të TIA-s, që mbetet një prej porteve ajrore më të rëndësishme të rajonit për transportin e pasagjerëve.
