Italia ka dhënë miratimin paraprak për sistemin e drejtimit të asistuar të kompanisë “Tesla”, duke u bërë vendi i parë i madh i Bashkimit Evropian që lejon përdorimin e kësaj teknologjie. Lajmi u bë i ditur nga ministri italian i Transportit, Matteo Salvini, i cili e cilësoi vendimin si një hap përpara drejt inovacionit dhe lëvizshmërisë së së ardhmes.
Sipas Salvinit, miratimi erdhi pas një vlerësimi të hollësishëm të fizibilitetit teknik, ndërsa procesi më i gjerë i autorizimit vijon të jetë në shqyrtim në nivel të Bashkimit Evropian.
Përmes një reagimi në platformën X, drejtori ekzekutiv i “Tesla”-s, Elon Musk, falënderoi ministrin italian për vendimin, duke shkruar: “Faleminderit, e vlerësoj shumë”.
Sistemi TAD, i njohur më parë si Full Self-Driving (FSD), bazohet në teknologjinë “duart larg timonit, sytë te rruga”. Ai mundëson drejtimin e automjetit në mënyrë të asistuar, por nuk e përjashton përgjegjësinë e drejtuesit. Ky i fundit duhet të qëndrojë pas timonit, të monitorojë vazhdimisht rrugën dhe të jetë i gatshëm të ndërhyjë në çdo moment.
Italia i bashkohet kështu disa vendeve të tjera të BE-së që kanë miratuar më parë përdorimin e kësaj teknologjie. Pas Holandës, e cila dha miratimin fillestar në prill, sistemi është njohur edhe në Lituani, Estoni, Danimarkë dhe Belgjikë.
Këto autorizime i kanë mundësuar kompanisë amerikane të zgjerojë përdorimin e teknologjisë së saj në tregun evropian, përpara një vendimi më të gjerë në nivel të Bashkimit Evropian.
Edhe “Tesla” konfirmoi miratimin për Italinë përmes një postimi në X, ku publikoi një video të filmuar nga brenda një automjeti që lëvizte në rrugët e Romës me sistemin e drejtimit të asistuar të aktivizuar. /skyweb.al















