Në sektorin e prodhimit të pijeve freskuese, vështirësitë mbeten të larta, veçanërisht për prodhuesit e vegjël që zakonisht operojnë me fitime minimale ose aspak.
Rënia e konsumit, kostot e larta fikse dhe mungesa e fuqisë punëtore po i çojnë këto biznese drejt falimentimit. Një nga rastet më të prekura është ai i fabrikës së pijeve freskuese “Fresh” në fshatin Dropull të Gjirokastrës.
Pas pesë vitesh të mbijetesës në kushte të vështira, fabrika “Fresh” ndodhet në kufijtë e mbylljes. Kapaciteti prodhues është reduktuar në vetëm 25% të linjave operative, kryesisht për shkak të mungesës së specialistëve në prodhim dhe shpërndarje.
Nga 90 punonjës që kishte në të kaluarën, aktualisht kompania funksionon me vetëm 30 punëtorë aktivë.
Administratori i kompanisë, z. Kostandin Bezhani, tregon se sfida më e madhe sot është gjetja e punonjësve. “Nuk po arrijmë të gjejmë punonjës as për prodhimin, as për shpërndarjen e produkteve në Tiranë dhe rrethe.
Pavarësisht se kemi rritur pagat, mungesa e stafit është e madhe, kryesisht për shkak të emigracionit”, shprehet ai.
Pagat që ofrohen janë konkurruese për tregun vendas, duke shkuar deri në 700 euro në muaj për pozicionet në shpërndarje, plus përqindje mbi shitjet.
Megjithatë, kjo nuk ka mjaftuar për të tërhequr të rinjtë, të cilët gjithnjë e më shumë zgjedhin të emigrojnë, veçanërisht drejt Gjermanisë, në kërkim të kushteve më të mira të jetesës dhe fitimeve më të larta.
“Problematika e gjetjes së punonjësve është e thelluar prej të paktën 2-3 vitesh. Të rinjtë nuk janë të interesuar të angazhohen në punë të tilla, edhe kur paguhen mirë, sepse kërkojnë fitime më të shpejta dhe më të larta jashtë vendit”, shton Bezhani.
Ngadalësimi i investimeve lokale dhe ndryshimet demografike e kanë përkeqësuar edhe më tej situatën. Kërkesa për produkte vendase është në rënie, ndërsa kostot për të mbajtur në punë një fabrikë janë rritur ndjeshëm. Si rezultat, aktiviteti i kompanisë është drejt mbylljes së plotë.
“Është e vështirë ta mbajmë më gjatë hapur fabrikën. Mungesa e punëtorëve, rënia e konsumit dhe vështirësitë në shpërndarje po na çojnë drejt një vendimi të pashmangshëm, mbylljes së aktivitetit”, thotë z. Bezhani.
Fabrika e prodhimit të pijeve freskuese “Fresh” e nisi aktivitetin prej vitit 1992, teksa ka investuar rreth 7 milionë euro në 2008 për rinovimin e linjave të prodhimit.
Kostandin Bezhani, sipërmarrësi i pijeve freskuese nga Dropulli, e ka ngritur në mënyrë të vazhdueshme problemin e gjetjes së fuqisë punëtore për shkak të shpopullimit të zonave rurale.
Alternativa e sipërmarrësit për eksport të prodhimit jashtë ka rezultuar e pasuksesshme për shkak të mungesës së konkurrueshmërisë së markës shqiptare dhe kostove të larta të transportit.
Pa masa të menjëhershme për të mbështetur prodhuesit e vegjël dhe për të frenuar largimin e fuqisë punëtore, sektori i prodhimit vendas rrezikon të zbehet në mënyrë të pakthyeshme. /monitor.al
