Presidenti i Shteteve të Bashkuara, Donald Trump, ka firmosur një urdhër ekzekutiv që parashikon vendosjen e një tarife të re prej 100,000 dollarësh për aplikantët në programin e vizave H-1B, të cilat përdoren për punësimin e punëtorëve të huaj të kualifikuar.
Proklamata e re do të ndalojë hyrjen në SHBA për këto kategori nëse pagesa nuk kryhet. Masat janë justifikuar nga administrata si një mënyrë për të nxitur kompanitë amerikane të trajnojnë punonjës vendas, ndërsa kundërshtarët i kanë cilësuar si një hap që dëmton aftësinë e SHBA-së për të tërhequr talentet më të mira globale.
Elon Musk dhe përfaqësues të tjerë të industrisë së teknologjisë kanë mbrojtur programin H-1B, duke e cilësuar atë si një mekanizëm jetik për inovacionin dhe konkurrueshmërinë amerikane. Nga ana tjetër, Trump dhe mbështetësit e tij argumentojnë se vizat kanë ulur mundësitë e punësimit për qytetarët amerikanë.
“100 mijë dollarë në vit për vizat H1-B, dhe të gjitha kompanitë e mëdha janë dakord,” tha presidenti gjatë ceremonisë në Zyrën Ovale, ku ishte i pranishëm edhe Sekretari i Tregtisë, Howard Lutnick. “Nëse do të trajnosh dikë, trajno një të diplomuar amerikan. Mos sill më njerëz që na marrin vendet e punës.”
Paralelisht, Trump njoftoi krijimin e një “karte të artë” për emigrantët e pasur, e cila do të përshpejtojë procesin e vizave në këmbim të tarifave që nisin nga 1 milion paund.
Aktualisht, numri i aplikimeve për vizat H-1B është i kufizuar në 85,000 në vit, ndërsa deri më tani tarifat administrative nuk kanë kaluar rreth 1,500 dollarë. Masa e re përbën një rritje drastike dhe pritet të ndezë debate të forta mbi të ardhmen e fuqisë punëtore dhe konkurrueshmërisë ekonomike të SHBA-së. /skyweb.al
