Agjencia ndërkombëtare e vlerësimit të kreditit Standard & Poor’s Global Ratings ka publikuar më 19 shtator 2025 raportin e saj të fundit, ku rikonfirmon vlerësimin afatgjatë të kreditit sovran të Shqipërisë në “BB” me perspektivë “të qëndrueshme”.
Ky vendim reflekton besimin e agjencisë për stabilitetin makroekonomik dhe qëndrueshmërinë e ekonomisë shqiptare përballë sfidave globale.
Sipas S&P, disiplina fiskale e qeverisë dhe rezervat e forta valutore mbështesin stabilitetin financiar të vendit. Agjencia parashikon që ekonomia shqiptare do të rritet me rreth 3.6% në vitin 2025, e nxitur nga konsumi i familjeve dhe rritja e pagave reale, ndërsa turizmi do të mbetet një shtyllë e rëndësishme e zhvillimit. Për periudhën 2026–2028, rritja ekonomike pritet të jetë mesatarisht 3.5% në vit.
Në aspektin fiskal, S&P thekson se qeveria pritet të ndjekë politika të kujdesshme pas zgjedhjeve, duke e mbajtur deficitin rreth 2% të PBB-së deri në vitin 2028. Borxhi publik pritet të ulet gradualisht në 51% të PBB-së në të njëjtin vit, duke siguruar stabilitetin e financave publike.
Një tjetër zhvillim pozitiv i nënvizuar është progresi në procesin e integrimit europian. Deri më tani Shqipëria ka hapur 24 nga 33 kapitujt e negociatave, ndërsa Komisioni Europian ka miratuar 920 milionë euro financim në kuadër të Planit të Rritjes për Ballkanin Perëndimor prej 6 miliardë eurosh.
Rezervat valutore të vendit janë rritur ndjeshëm, duke arritur në 7.8 miliardë dollarë në mesin e vitit 2025, falë blerjeve neto të Bankës së Shqipërisë dhe emetimit të Eurobondit. Këto rezerva krijojnë një mburojë të fortë ndaj goditjeve të jashtme.
Rikonfirmimi i vlerësimit nga S&P shihet si një sinjal pozitiv për investitorët ndërkombëtarë, duke dëshmuar progresin e vazhdueshëm ekonomik të Shqipërisë dhe menaxhimin e matur të politikave fiskale e monetare. /skyweb.al
