Tregtia elektronike po bëhet gjithnjë e më e pranishme në Shqipëri, duke zënë një peshë të ndjeshme në ekonominë vendase. Sipas të dhënave më të fundit të publikuara nga INSTAT, gjatë vitit 2025 më shumë se 10 për qind e xhiros tregtare në vend është realizuar përmes blerjeve dhe shitjeve online.
Raporti thekson se vlera e xhiros nga shitjet online arriti në 10,1% gjatë vitit 2025, duke shënuar një rritje prej 0,6 pikë përqindje krahasuar me vitin 2024. Peshën më të madhe e mbajnë ndërmarrjet që veprojnë në fushën e tregtisë me shumicë dhe pakicë me 46,1% të totalit, ndjekur nga sektori i Informacionit dhe Komunikimit me 16,5%.
Edhe numri i bizneseve që përdorin tregtinë elektronike është në rritje.
Të dhënat tregojnë se në vitin 2025, rreth 28% e ndërmarrjeve shqiptare kanë shitur produkte ose shërbime përmes faqeve të internetit, aplikacioneve të dedikuara dhe platformave të e-commerce. Kjo përbën një rritje prej 3,5% krahasuar me një vit më parë.
Në detaje, aktivitetet e Akomodimit dhe Shërbimit Ushqimor kryesojnë me 48,2% të shitjeve online, të ndjekura nga aktivitetet Profesionale, Shkencore dhe Teknike me 44,8% dhe sektori i Informacionit dhe Komunikimit me 43,3%.
Të dhënat e reja konfirmojnë se tregtia online po konsolidohet si një nga kanalet kryesore të shitjeve në Shqipëri, duke e bërë pjesë të pandashme të modelit të ri të zhvillimit ekonomik dhe konsumit. /skyweb.al
