Tregtia e jashtme e Shqipërisë ka shënuar një rënie të fortë gjatë muajit gusht 2025.
Sipas të dhënave të fundit të publikuara nga INSTAT, eksportet e mallrave arritën në 25 miliardë lekë, duke u ulur me 27,9% krahasuar me muajin korrik 2025.
Në të njëjtën linjë, edhe importet kanë shënuar rënie. Gjatë gushtit, importet u vlerësuan në 67 miliardë lekë, duke pësuar një tkurrje prej 2,7% krahasuar me gushtin e vitit të kaluar dhe 19,6% më pak se në korrik 2025.
Këto zhvillime sollën një deficit tregtar prej 42 miliardë lekësh, i cili rezulton 10,2% më i ulët krahasuar me gushtin 2024 dhe 13,5% më pak se në muajin korrik të këtij viti.
Sipas INSTAT, në grupet e mallrave të eksportuara u shënua rritje për “Minerale, lëndë djegëse dhe energji elektrike”, ndërsa rënie më të madhe në import u regjistrua tek “Makineri, pajisje dhe pjesë këmbimi”. Nga ana tjetër, importet e materialeve të ndërtimit dhe lëndëve djegëse kanë qenë në rritje.
Pavarësisht kësaj tkurrjeje të përgjithshme, eksportet drejt disa partnerëve kryesorë shënuan rritje të ndjeshme. Shkëmbimet me Kosovën u rritën me 94,6%, me Greqinë me 19%, si dhe pati rritje të dukshme me Spanjën. Në total, tregtia me vendet e Bashkimit Europian përbën 48,8% të volumit të përgjithshëm tregtar të Shqipërisë.
Këto të dhëna pasqyrojnë një ngadalësim të ritmeve tregtare në gusht, i cili, megjithatë, shoqërohet me sinjale pozitive nga partnerët rajonalë dhe europianë.
