Një incident i rëndë është regjistruar në Florida, ku një avion i vogël u përplas papritur mbi një automjet në autostradë, duke plagosur një person dhe duke shkaktuar panik mes drejtuesve të mjeteve. Pamjet e qarkulluara në rrjet tregojnë momentin dramatik kur avioni Beechcraft 55 humb kontrollin dhe bie mbi një Toyota Camry që po lëvizte në trafik.
Autoritetet thanë se piloti kishte raportuar probleme me motorin pak para se të ndodhte aksidenti, duke e detyruar atë të tentonte një ulje emergjente. Ngjarja ndodhi rreth orës 17:45 të së hënës. Shoferja e makinës, një 57-vjeçare, u dërgua menjëherë në spital dhe ndodhet jashtë rrezikut. Ndërkohë, piloti 27-vjeçar nga Orlando dhe pasagjeri i tij, po aq 27 vjeç nga Temple Terrace, shpëtuan pa lëndime.
Të dy mbetën në vendin e ngjarjes deri në mbërritjen e patrullës së autostradës, e cila ka nisur hetimet për mënyrën se si ndodhi përplasja.
“Thjesht pamë një avion të vinte drejt nesh. Fluturoi vetëm disa centimetra mbi makinën time”, rrëfeu një dëshmitar që ndodhej pranë momentin e aksidentit.
Fotot dhe videot nga vendi i ngjarjes tregojnë dëmtime të rënda në automjet dhe avionin që ka humbur rrotën dhe pjesën e përparme nga goditja.
FAA ka hapur një hetim të plotë për uljen e detyruar, ndërsa edhe Patrulla e Autostradës së Floridës po kryen ekzaminimet e saj. Aksidenti vjen vetëm disa orë pasi një avion tjetër i vogël u detyrua të bënte ulje emergjente në një kryqëzim në DeLand, ku u plagosën dy persona.
