Italia ka një arsye të madhe për të festuar: kuzhina italiane është shpallur për herë të parë si “trashëgimi kulturore jomateriale” nga UNESCO, duke u bërë kështu gastronomia e parë kombëtare në botë që merr një vlerësim të tillë. Vendimi u mor në asamblenë ndërkombëtare të zhvilluar në New Delhi dhe përfshin të gjithë traditën kulinare italiane, jo vetëm një pjatë apo një praktikë të vetme.
Njohja nderon jo vetëm ushqimet ikonike të Italisë, por edhe të gjithë procesin kulturor që lidhet me to: mënyrat e përgatitjes, ritualet e ngrënies, recetat familjare dhe trashëgiminë që transmetohet nga brezi në brez. Kuzhina italiane vlerësohet si një element i fortë identiteti kombëtar, që bashkon familjet dhe komunitetet rreth tryezës.
Kryeministrja Giorgia Meloni e ka quajtur këtë vendim një nder për kulturën dhe traditën italiane. Ministri i Bujqësisë, Francesco Lollobrigida, i cili ka udhëhequr procesin e aplikimit për tre vite, është shprehur se ky status do të ndihmojë në mbrojtjen e kuzhinës italiane nga imitimet dhe produktet joautentike.
Me këtë arritje, Italia bëhet vendi i parë që merr një njohje të tillë për të gjithë kuzhinën kombëtare, duke e forcuar edhe më shumë pozicionin e saj si një prej traditave kulinare më të njohura dhe më të dashura në botë. /skyweb.al
