Një studim i ri shkencor hedh dritë mbi një nga veprat më të famshme të Vincent van Goghut, duke sugjeruar se piktura “Nata me yje” mund të jetë frymëzuar nga një konfigurim real i qiellit mbi Saint-Rémy të Francës, në agimin e 22 korrikut 1889.
Studimi, i publikuar në revistën shkencore “Scientific Reports” nga studiues të Universitetit Kyung Hee në Seul, në bashkëpunim me kompaninë koreano-jugore “Sllab”, analizon pozicionet e Hënës, Venusit dhe yjeve për të krahasuar qiellin e asaj periudhe me elementet e paraqitura në pikturë.
Tradicionalisht, krijimi i veprës është lidhur me qershorin e vitit 1889, bazuar në një letër që Van Gog i kishte dërguar vëllait të tij, Teos, rreth datës 18 qershor. Megjithatë, faza e Hënës gjatë asaj periudhe nuk përputhet me gjysmëhënën e hollë të përshkruar në pikturë.
Për të shqyrtuar këtë mospërputhje, studiuesit ndërthurën simulimet astronomike me të dhënat historike të motit, matjet e pozicioneve të yjeve dhe analizën e korrespondencës së artistit. Ata përdorën gjithashtu skicat e mëparshme të peizazhit për të rindërtuar këndvështrimin e paraqitur në veprën e famshme.
Rezultatet tregojnë se në agimin e 22 korrikut 1889, Hëna në fazën e saj të fundit dhe planeti Venus mund të kenë qenë të dukshëm në një pozicion që përputhet, në vija të përgjithshme, me atë të paraqitur në pikturë. Edhe të dhënat meteorologjike sugjerojnë se kushtet atmosferike mund të kenë lejuar vëzhgimin e qiellit.
Një tjetër element që mbështet këtë hipotezë janë referencat e shpeshta të Van Goghut ndaj gjinkallave në letrat e tij, të cilat mund të lidhen me kushtet e ngrohta të verës. Përmes analizës gjeometrike, studiuesit evidentuan gjithashtu ngjashmëri mes pesë yjeve qendrorë të pikturës dhe një grumbullimi yjor.
Sipas gjetjeve, artisti mund të jetë mbështetur në një pamje reale astronomike gjatë krijimit të “Natës me yje”, duke ndërthurur vëzhgimin e natyrës me interpretimin e tij artistik.
Megjithatë, studiuesit theksojnë se përputhjet e identifikuara nuk përbëjnë një konfirmim përfundimtar të datës së krijimit të veprës. Ato ofrojnë një hipotezë të re mbi frymëzimin e Van Goghut dhe marrëdhënien mes qiellit real dhe paraqitjes së tij artistike. /skyweb.al
