Kryeministri Edi Rama u ka vendosur një afat të prerë bashkive të vendit për dorëzimin e hartave të zonave prioritare në kuadër të “Paketës së Maleve”, program që synon nxitjen e investimeve në zonat malore.
Në një takim me kryetarët e bashkive, Rama tha se deri në fund të muajit tetor të gjitha njësitë vendore duhet të kenë dorëzuar hartat përkatëse, duke e cilësuar të “pafalshme” që pesë muaj pas miratimit të ligjit, vetëm pesë bashki, Tropojë, Elbasan, Belsh, Përmet dhe Skrapar, e kanë përmbushur këtë detyrim.
“Duhet t’i bëni menjëherë hartat. Krijoni një task-forcë me tre persona dhe qëndroni në dispozicion të atyre që duan të investojnë, sepse 500 të parët që përfitojnë nga ‘Pakoja e Maleve’ nuk do të paguajnë asnjë taksë për 10 vjet. Mos ua vështirësoni procesin, ndihmojini që të përfitojnë,” – theksoi Rama.
Sipas tij, territori që do të përfshihet në hartat e zhvillimit duhet të jetë ligjërisht i ndërtueshëm, ndërsa shteti do të marrë përsipër çdo përgjegjësi në rast të ndonjë konflikti pronësie në të ardhmen. “Zgjohuni nga ky gjumë dhe brenda tetorit duhet të vijnë të gjitha hartat. Ky është interes kombëtar dhe s’ka ndarje politike,” – shtoi kryeministri.
Nga ana tjetër, ministri i Pushtetit Vendor, Ervin Demo, bëri të ditur se vetëm në pesë bashkitë që kanë dorëzuar hartat janë evidentuar 33 projekte me vlerë mbi 10 milionë euro, të cilat pritet të hapin vende të reja pune dhe të krijojnë një zinxhir ekonomik të plotë në zonat malore.
Demo sqaroi se javën e ardhshme qeveria do të miratojë me vendim të Këshillit të Ministrave zonat prioritare për këto pesë bashki dhe se është ngritur një grup pune që do të ndihmojë njësitë vendore në terren për ta përshpejtuar procesin. “Praktika është e konsoliduar, udhëzimi është i qartë dhe ky proces do të ecë pa vonesa,” – u shpreh ministri. /skyweb.al
