Një trend i ri po transformon mënyrën si përkufizohet luksit në turizëm: gjithnjë e më shumë udhëtarë të pasur po zgjedhin përvoja ku ushqimi nuk u shërbehet, por e gatuajnë vetë pasi e kanë peshkuar, mbledhur apo gjuajtur me duart e tyre. Nga bregdeti italian i Amalfit, deri në pyjet e Skocisë dhe ishujt e Kanadasë, turizmi “nga toka në pjatë” po kthehet në një mënyrë të re për t’u lidhur me natyrën dhe kulturën vendase.
Në hotelin Casa Angelina në Bregun e Amalfit, turistët lënë suitat luksoze për të dalë natën në det me peshkatarët vendas, në kërkim të kallamarëve që më pas do t’i gatuajnë me shefin e kuzhinës së hotelit në një recetë tradicionale të rajonit të Kampanias. “Është mënyra më autentike për të përjetuar shpirtin e detit dhe jetën e njerëzve të Praianos,” – shpjegon Marina Rumolo, përfaqësuese e hotelit që krijoi këtë eksperiencë.
Ky trend është përhapur në të gjithë botën. Në Sienë dhe Firence, hotelet Rosewood Castiglion del Bosco dhe Savoyofrojnë ekspedita për kërkimin e tartufeve, ndërsa në Skoci, hoteli Fife Arms organizon udhëtime për mbledhjen e bimëve të egra që përdoren në çajra dhe kozmetikë. Në Meksikë, turistët e Rosewood Mayakoba mbledhin përbërësit e darkës në kopshtin e hotelit, ndërsa në Kanada, në Fogo Island Inn, vizitorët mësojnë të përdorin bimët lokale për përgatitjen e pijeve tradicionale.
Ekspertët e turizmit thonë se kjo prirje lidhet me dëshirën për t’u shkëputur nga jeta dixhitale dhe për t’u kthyer tek përvoja e vërtetë fizike dhe natyrore. “Në një botë ku teknologjia na e merr gjithë vëmendjen, njerëzit kërkojnë të ndiejnë tokën, aromën e pyllit dhe origjinën e ushqimit të tyre,” – shpjegon Vinod Narayan, drejtues i resortit Wildflower Farms në New York, ku mysafirët mësojnë të dallojnë, mbledhin dhe përdorin bimët e egra.
Këto përvoja, që kushtojnë nga 500 deri në disa mijëra dollarë, po e ndryshojnë vetë kuptimin e luksit modern. Në vend të luksit të qetësisë dhe shërbimit të plotë, luks sot është autenticiteti, përfshirja dhe lidhja me kulturën lokale.
“Në një kohë kur gjithçka është artificiale, të ushqehesh nga natyra është ndoshta forma më e pastër e luksit që ekziston,” – thotë Dina Falconi, eksperte bimore që drejton turet e mbledhjes së bimëve në Hudson Valley. /skyweb.al
