Janë hapur zyrtarisht aplikimet për skemën e mbështetjes financiare që u dedikohet studentëve më të mirë, të cilët kanë nisur për herë të parë studimet në programet e universiteteve publike.
Kjo skemë, një nga më të rëndësishmet në mbështetjen e arsimit të lartë, synon të nxisë ekselencën dhe meritokracinë, duke ofruar bursë në masën e pagës minimale në shkallë vendi dhe përjashtim nga tarifa e studimeve për studentët me rezultate të shkëlqyera, ata që ndjekin programe prioritare, si dhe fituesit e olimpiadave kombëtare dhe ndërkombëtare.
Sipas Agjencisë Kombëtare të Financimit të Arsimit të Lartë, afati i fundit për dorëzimin e aplikimeve është 20 dhjetori 2025, ndërsa përfitues do të jenë vetëm ata studentë që ndjekin për herë të parë një program studimi në universitetet publike.
Aplikimet kryhen online përmes portalit e-Albania, duke zgjedhur shërbimin “Aplikim për mbështetje financiare”.
Kështu, studentët mund të plotësojnë dokumentacionin pa pasur nevojë të paraqiten fizikisht në institucione.
Pas mbylljes së aplikimeve, Agjencia do të verifikojë të gjitha kërkesat dhe dokumentet përkatëse, ndërsa lista përfundimtare e përfituesve pritet të shpallet në muajin shkurt 2026.
Skema e re është pjesë e politikave për të mbështetur talentet e reja dhe për t’i inkurajuar që të zhvillojnë karrierën e tyre akademike brenda vendit. /skyweb.al
