Kryeministri Edi Rama ka prezantuar para grupit parlamentar të Partisë Socialiste një dokument të titulluar “Besa”, i cili sipas tij duhet të shënojë një pikë kthese në mënyrën se si administrata komunikon dhe sillet me qytetarët gjatë mandatit të katërt qeverisës.
Duke folur para deputetëve socialistë, Rama solli si shembull rastin e Arbërit, një fermer nga Lushnja, i cili kishte pritur për tre vite për të marrë një përgjigje lidhur me një kërkesë të tij ndaj institucioneve.
Kryeministri tha se fermeri kishte përfunduar në protestë jo domosdoshmërisht si kundërshtar i qeverisë, por për shkak të mënyrës se si ishte trajtuar nga administrata.
“Flamingo mund të dalë në protestë dhe mund të jetë aleati ynë. Ndaj vija e re ndarëse kalon mes atyre që duan ta bëjnë Shqipërinë më të mirë”, u shpreh Rama.
Sipas tij, rasti i fermerit nxori në pah një problem të administratës, e cila për tre vite nuk kishte marrë mundimin t’i shpjegonte qartë se përse kërkesa e tij nuk mund të realizohej.
Rama tregoi se fermeri kishte krijuar madje bindjen se për zgjidhjen e çështjes duhej të paguante ryshfet.
“Lekë për ryshfet nuk kam dhe as nuk kam ndërmend”, citoi Rama një prej reagimeve të fermerit, duke shtuar se shpjegimet e dhëna vetëm pasi ai kishte dalë në protestë mund të perceptoheshin si arrogancë.
Kryeministri tha se pas bisedës me fermerin kishte kërkuar të dinte përse institucionet nuk i kishin kthyer përgjigje për tre vite.
“Përse duhet të presë tre vite vetëm për të mësuar se kërkesa jote nuk bëhet? Halli bëhet më poshtërues kur mbetet as po, as jo”, deklaroi ai.
Rama kritikoi gjithashtu faktin që pas interesimit të tij kishte marrë një mesazh me postimet e fermerit nga protesta, sikur fakti që ai ishte kundër qeverisë të ndryshonte thelbin e problemit.
“Arbri nga Lushnja nuk është problemi, është prova dhe sprova që kemi me veten tonë”, tha kryeministri.
Sipas Ramës, pikërisht ky rast dhe të tjera problematika të ngjashme kanë çuar në hartimin e dokumentit “Besa”.
Ai tha se kishte zgjedhur këtë emër për të përmbledhur ndryshimin që kërkon të realizojë në mandatin e katërt, pavarësisht se parashikon që titulli mund të shkaktojë debat.
“E kam titulluar ‘Besa’. E di se do hapë debat, por nuk gjeta fjalë tjetër për atë se çfarë kthese duhet për këtë mandat të katërt. Që njerëzit të mos ndihen të prerë në besë dhe të mos ndihen të papërfillur”, deklaroi Rama.
Kryeministri u bëri të ditur deputetëve socialistë se dokumentin do ta marrin me vete për ta analizuar gjatë pushimeve.
