Tirana dhe Elbasani vijojnë të regjistrojnë nivele të larta të grimcave PM10, duke tejkaluar kufijtë vjetorë të lejuar. Sipas Raportit të Gjendjes në Mjedis 2025 të Agjencisë Kombëtare të Mjedisit (AKM), Elbasani është gjithashtu i vetmi qytet ku është tejkaluar norma vjetore për dioksidin e azotit (NO₂).
Raporti bazohet në monitorimin e cilësisë së ajrit në nëntë stacione në Tiranë, Durrës, Elbasan, Shkodër, Korçë dhe Fier. Gjatë periudhës korrik–dhjetor 2025, në stacionin “Tirana Higjena” u regjistrua një mesatare prej 57.66 μg/m³ PM10, ndërsa në Elbasan 59.72 μg/m³, të dyja mbi kufirin e lejuar. Në “Tirana Higjena” u regjistruan edhe 33 ditë me tejkalim të normës ditore.
Për grimcat PM2.5 nuk u konstatuan tejkalime në asnjë stacion, ndërsa për NO₂ norma u tejkalua vetëm në Elbasan. Nuk u regjistruan tejkalime për SO₂ dhe benzenin, ndërsa tejkalime të ozonit u evidentuan në Fier, Korçë, Shkodër dhe Tiranë. Monoksidi i karbonit tejkaloi normën vetëm në Fier.
Sipas AKM-së, ndotësi kryesor i ajrit mbeten grimcat PM10, me burim kryesor trafikun rrugor, ndërsa ndotja ndikohet edhe nga aktivitetet e ndërtimit dhe përdorimi i lëndëve djegëse fosile për ngrohje. /skyweb.al
