Financial Times
Kreu ekzekutiv i JPMorgan Chase, Jamie Dimon, ka bërë një paralajmërim të fortë në lidhje me gjendjen e tregut amerikan të obligacioneve, duke deklaruar se borxhi në rritje i SHBA-së do të çojë në një “tronditje” të këtij tregu jetik për ekonominë globale.
Sipas tij, nëse nuk ndërmerren masa, situata do të përkeqësohet ndjeshëm. “Po ju them se kjo do të ndodhë. Ju do të bëni panik. Unë jo. Ne do t’ia dalim,” tha Dimon gjatë Forumit Ekonomik Kombëtar Reagan në Kaliforni.
Paralajmërimi i Dimon vjen në një moment kur Kongresi amerikan po shqyrton projektbuxhetin e administratës Trump, i cili pritet të rrisë ndjeshëm deficitin federal.
Që përpara miratimit të këtij legjislacioni, Zyra për Buxhetin e Kongresit kishte paralajmëruar se borxhi publik i SHBA-së, si përqindje ndaj PBB-së, do të tejkalojë nivelet rekord të viteve 1940.
Në të njëjtën kohë, tregu i obligacioneve afatgjata është nën presion: norma e interesit për obligacionet 30-vjeçare të Thesarit është rritur në rreth 5%, nga pak mbi 4% në fillim të vitit. Edhe agjencia Moody’s e ka ulur kredibilitetin e SHBA-së, duke ia hequr vlerësimin e lartë “AAA” në fillim të këtij muaji.
Tregu i borxhit të Thesarit amerikan ka kaluar nga 5 trilionë dollarë në vitin 2008 në 29 trilionë sot, për shkak të politikave që kanë kombinuar uljen e taksave me rritjen e shpenzimeve, veçanërisht gjatë pandemisë.
Megjithëse mbetet tregu më i madh dhe më i likuid në botë, me përfitime nga statusi i dollarit si monedhë rezervë globale, kërkesa për obligacionet amerikane ka nisur të bjerë, edhe për shkak të tërheqjes graduale të investitorëve të huaj, të nxitur edhe nga politikat proteksioniste të administratës Trump.
Dimon tha se tensionet gjeopolitike, luftërat tregtare dhe rritja e borxheve globale po shkaktojnë një “lëvizje të pllakave tektonike” në ekonominë botërore.
Ai bëri thirrje për një rishikim të rregullave që kufizojnë kapacitetin e bankave për të tregtuar obligacione dhe për një drejtim të ri fiskal. “Mendoj se gjithçka mund të përmirësohet, përfshirë edhe këtë, nëse ndryshojmë disa nga këto rregulla dhe politika.”
Në të njëjtën linjë është shprehur edhe presidenti i Goldman Sachs, John Waldron, i cili këtë javë e quajti deficitin në rritje të SHBA-së “shqetësues” dhe ndikimin e tij në tregun e obligacioneve si “rrezikun më të madh makroekonomik aktual”.
Ai shtoi se normat e interesit do të vazhdojnë të rriten dhe kostoja e kapitalit në ekonomi do të bëhet gjithnjë e më shumë një pengesë për rritjen ekonomike. /Skyweb.al
