Rreth 2 miliardë filxhanë kafe konsumohen çdo ditë në botë. Për miliona njerëz që nuk e nisin dot ditën pa këtë pije, lajmi i mirë është se konsumi i moderuar i kafesë jo vetëm që nuk rezulton i dëmshëm, por mund të sjellë edhe disa përfitime për shëndetin.
Studime të shumta laboratorike kanë treguar se përbërësit kryesorë të kafesë, si kafestoli, kahweoli, kafeina dhe acidet klorogjenike, kanë veti antiinflamatore dhe ndihmojnë në reduktimin e dëmtimeve qelizore të shkaktuara nga oksidimi. Një studim i vitit 2016 i udhëhequr nga Marzieh Moeenfard në Universitetin e Portos, evidentoi se kafestoli dhe kahweoli, të pranishëm në përqindje më të lartë në kafen e pafiltruar, mund të ngadalësojnë zhvillimin e tumoreve duke penguar formimin e enëve të reja të gjakut rreth qelizave kancerogjene. Gjithashtu, acidet klorogjenike frenojnë formimin e kancerogjenëve në trup.
Një tjetër kërkim i zhvilluar në Institutin Karolinska të Stokholmit, i udhëhequr nga Jin-Kyoung Oh, tregoi se gratë në post-menopauzë që konsumonin 3-4 filxhanë kafe në ditë kishin ndjeshëm më pak rrezik për zhvillimin e kancerit të gjirit. Në Japoni, konsumi i rregullt i kafesë është lidhur me ulje të rrezikut për kancer të mëlçisë, përcjell Skyweb.al.
Përveç kësaj, kafeina si stimulues është studiuar për ndikimin e saj në shëndetin mendor dhe neurologjik. Disa hulumtime kanë treguar se mund të ndihmojë në parandalimin ose ngadalësimin e sëmundjeve si Alzheimeri, Parkinsoni dhe depresioni. Një studim i vitit 2020 nga Hong Chien-Tai në Universitetin Mjekësor të Taipeit zbuloi se pacientët me Parkinson që konsumonin rregullisht kafeinë e përjetonin përparimin e sëmundjes në ritëm më të ngadaltë.
Megjithatë, rezultatet nuk janë gjithmonë të njëtrajtshme. Lloji i kafesë, mënyra e përgatitjes, përmasat dhe përqendrimi i përbërësve aktivë mund të ndikojnë në efektet përfundimtare. Ajo që mbetet e qartë është se konsumi i moderuar, deri në 400 mg kafeinë në ditë ,në përgjithësi është i padëmshëm.
Konsumi i tepruar, nga ana tjetër, sjell pasoja më të qarta: dhimbje koke, ankth, dridhje muskujsh, pagjumësi dhe tension të lartë. Për më tepër, shumë njerëz e pasurojnë kafen me shtesa si qumësht, krem, sheqer apo shurup, të cilat në sasi të mëdha mund të ndikojnë negativisht në metabolizëm, duke rritur rrezikun për diabet tip 2, kolesterol të lartë dhe sëmundje kardiovaskulare.
Për të përfituar më së miri nga efektet e saj pozitive, kafeja duhet konsumuar me kujdes, dhe sa më natyrale, aq më mirë. Një filxhan i zi e i hidhur mund të jetë më shumë se një zakon: mund të jetë një aleat për shëndetin. /economist
