Tre gjigantët evropianë të industrisë së hapësirës, Airbus, Leonardo dhe Thales, kanë nënshkruar një marrëveshje strategjike për zhvillimin e teknologjive të reja orbitale dhe raketore, me qëllim të krijimit të një alternative evropiane ndaj dominimit të SpaceX të Elon Musk.
Sipas Financial Times, aleanca synon të kombinojë ekspertizën e Airbus në prodhimin e anijeve kozmike, kapacitetet teknologjike të Thales Alenia Space dhe përvojën industriale të Leonardos për të forcuar konkurrencën e Evropës në tregun global të lançimeve komerciale dhe satelitëve.
Projekti, që do të mbështetet financiarisht nga Bashkimi Evropian dhe Agjencia Evropiane e Hapësirës (ESA), pritet të fokusohet në zhvillimin e një platforme të re të lançimeve dhe konstelacioneve satelitore me kosto më të ulët dhe efikasitet më të lartë, në përpjekje për të sfiduar epërsinë teknologjike dhe komerciale të SpaceX.
Ky bashkëpunim shihet si një hap i rëndësishëm drejt autonomisë evropiane në hapësirë, në një moment kur varësia nga kompanitë amerikane për shërbimet orbitale dhe transportin hapësinor është bërë gjithnjë e më e dukshme.
Zyrtarët e kompanive kanë deklaruar se objektivi është të “rikthehet Europa në garën hapësinore” dhe të krijohet një zinxhir i plotë prodhimi, nga raketat e lançimit te sistemet satelitore dhe komunikimet orbitale. /skyweb.al
