Duke mbajtur në duar një kuti elegante të zezë, të stampuar me fjalët “World’s Best Rice” në ngjyrë ari, shefi japonez Kenichi Fujimoto buzëqesh lehtë, me një hije skepticizmi në fytyrë. “Këto gjëra shpesh janë shumë komerciale dhe jo domosdoshmërisht të mira,” thotë shefi me bazë në Hong Kong, ndërsa hedh një vështrim drejt tenxheres ku orizi po zien ngadalë.
Me më shumë se 20 vite përvojë duke punuar nën mjeshtër sushi të vlerësuar me yje Michelin, Fujimoto ka provuar qindra lloje orizesh. Por ky është ndryshe. Prodhuesit e Kinmemai Premium jo vetëm pretendojnë se është orizi më i mirë në botë, por në vitin 2016 edhe Guinness World Records e ka certifikuar si më të shtrenjtin.
CNN i kërkoi pikërisht Fujimotos të gjykojë nëse ky oriz e meriton famën. Gruri është shpëlarë, njomur dhe vendosur në një tenxhere prej gize me ujë për t’u gatuar, një provë tejet e rëndësishme për një shef japonez.
“Orizi është ushqimi i shpirtit në Japoni,” thotë ai. “Për sushi, orizi është pjesa më e rëndësishme, 80% e një sushi të mirë vjen nga orizi, dhe vetëm 20% nga peshku.”
Në Japoni, orizi ka qenë një ushqim i shenjtë për rreth 3,000 vjet. Sot kultivohen më shumë se 300 varietete, dhe çdo vit krijohen varietete të reja. Pjatat e njohura si sushi, mochi dhe pija tradicionale sake kanë arritur famë ndërkombëtare, por eksportet e orizit japonez nuk kanë patur të njëjtin sukses.
Këtu hyn në skenë Keiji Saika, presidenti 91-vjeçar i kompanisë Toyo Rice Corporation. Në vitin 2016 ai vendosi të promovonte më fuqishëm orizin japonez jashtë vendit. Me seli në Ëakayama, kompania e tij prodhon makina për bluarjen e orizit dhe gjithashtu shet llojin Kinmemai, që do të thotë “Oriz me Filiza të Artë” – një varietet i vlerësuar për shijen dhe vlerat ushqyese.
“Ndjeva se Japonia duhej t’i tregonte botës se sa i jashtëzakonshëm është orizi ynë,” thotë Saika për CNN. Kështu i lindi ideja e aplikimit për Guinness Ëorld Records: “Duhej të bënim diçka që nuk ishte bërë më parë.”
I bindur se prodhonte orizin më të shijshëm në botë, ai nxori në treg Kinmemai Premium po atë vit, me një çmim prej 9,496 jenësh për 840 gramë, rreth 109 dollarë për kilogram, një çmim shumëfish më i lartë se orizi i zakonshëm i cili kushtonte 300–400 jenë për kilogram.
Saika pranon se dyshonte nëse dikush do ta blinte. Por kërkesat filluan të shtoheshin. Ajo që nisi si një botim i vetëm, tani është kthyer në një lançim vjetor. Këtë vit, kutitë dalin në treg për 10,800 jenë secila. /Skyweb.al
