Shqipëria rezulton vendi me nivelin më të lartë të privimit të rëndë material dhe social në Europë, sipas të dhënave më të fundit të Eurostat për vitin 2024.
Treguesi mat përqindjen e popullsisë që nuk mund të përballojë të paktën 7 nga 13 elementë që konsiderohen të nevojshëm për një standard të përshtatshëm jetese, si pagesa e qirasë dhe faturave, përballimi i shpenzimeve të papritura, ushqimi i rregullt me mish ose peshk, pushimet një javore larg shtëpisë, blerja e rrobave dhe këpucëve të reja, pjesëmarrja në aktivitete sociale dhe aksesi në internet.
Sipas të dhënave të Eurostat, 34.8% e popullsisë në Shqipëri jetonte në kushte të privimit të rëndë material dhe social në vitin 2024. Ky është niveli më i lartë në Europë dhe rreth pesë herë më i madh se mesatarja e Bashkimit Europian, që ishte 6.3%.
Hendeku mbetet i madh edhe në raport me rajonin. Maqedonia e Veriut e ka këtë tregues në nivelin 11.6%, Serbia 10.3%, ndërsa Mali i Zi 12.3%. Për Bosnjë Hercegovinën dhe Kosovën nuk ka të dhëna të publikuara.
Megjithatë, krahasuar me vitet e mëparshme, Shqipëria ka shënuar përmirësim. Në vitin 2018, norma e privimit të rëndë material dhe social ishte pranë 46%, ndërsa në vitin 2024 ra në 34.8%. Pavarësisht rënies, niveli mbetet shumë më i lartë se në vendet e tjera të Europës.
Në Bashkimin Europian, numri i personave që jetojnë në kushte të privimit të rëndë material dhe social ka rënë nga rreth 41 milionë në vitin 2015 në 27.5 milionë në vitin 2024.
Brenda BE-së, nivelet më të larta regjistrohen në Rumani me 16.8%, Bullgari me 15% dhe Greqi me 14.9%. Në anën tjetër, nivelet më të ulëta janë në Poloni me 2%, Holandë dhe Çeki me 2.6%, si edhe Austri me 2.9%.
Treguesi i privimit material dhe social përdoret nga Eurostat për të matur mungesën e detyruar të disa elementëve bazë të jetesës. Ai përfshin si nevojat e familjes, ashtu edhe ato individuale, duke nisur nga aftësia për të paguar faturat dhe për të mbajtur banesën të ngrohtë, deri te mundësia për të pasur jetë sociale, internet dhe shpenzime minimale personale.
