Autoriteti Rrugor Shqiptar po përgatit procedurën për tenderimin e fazës së tretë të bypass-it të Tiranës, një nga projektet kryesore infrastrukturore që synon të lehtësojë trafikun në kryeqytet.
Sipas të dhënave të publikuara në Agjencinë e Prokurimit Publik, fondi limit për këtë kontratë është parashikuar në 2.5 miliardë lekë.
Procedura pritet të hapet gjatë muajit të ardhshëm, pasi të përfundojnë diskutimet mes ARRSH dhe Ministrisë së Infrastrukturës për disa elemente fundore që kërkojnë saktësim.
Ndërkohë, punimet kanë nisur në dy fazat e para të projektit. Sipas ARRSH, realizimi fizik ka arritur në rreth 18 deri në 20%, ndërsa në terren po kryhen gërmime, skarifikime dhe mbushje për formimin e trupit të rrugës.
Aktualisht po punohet edhe për ndërtimin e dy urave të parashikuara në këto lote, si dhe për profilimin e skarpateve përgjatë gjurmës së projektit.
Për fazën e parë dhe të dytë, vlera e kontratave arrin në 5.9 miliardë lekë, ndërsa gjatësia e përfshirë në këto lote është rreth 8.2 kilometra.
Bypass-i i Tiranës parashikohet të ketë një gjatësi totale prej 21.6 kilometrash. Ai do të lidhë autostradën Tiranë-Durrës me autostradën Tiranë-Elbasan, duke shmangur kalimin e trafikut tranzit përmes kryeqytetit.
Traseja nis pranë rrugës Thumanë-Kashar dhe përfundon në Mullet. Rruga do të ketë dy korsi për secilin drejtim lëvizjeje, ndërsa shpejtësia e lejuar është parashikuar deri në 120 kilometra në orë./skyweb.al
