Autoriteti Italian për Sigurinë e Fluturimeve ka publikuar raportin për incidentin e rëndë të ndodhur më 1 tetor 2024 në aeroportin Orio al Serio të Bergamos, ku një avion Boeing 737 MAX 8-200 i kompanisë Ryanair pësoi dëmtime gjatë uljes.
Avioni po kryente fluturimin nga Barcelona drejt Bergamos me 162 pasagjerë dhe gjashtë anëtarë ekuipazhi në bord. Menjëherë pasi preku pistën, katër gomat e trenit kryesor të uljes shpërthyen, duke dëmtuar avionin dhe sipërfaqen e pistës.
Pavarësisht incidentit, avioni arriti të ndalonte në mënyrë të sigurt dhe asnjë nga personat në bord nuk mbeti i lënduar. Pasagjerët zbritën normalisht përmes shkallëve, pa qenë e nevojshme një evakuim emergjent.
Sipas raportit të hetimit, kushtet atmosferike dhe afrimi për ulje ishin normale. Problemi kryesor lidhej me sistemin “anti-skid”, i cili shërben për të parandaluar bllokimin e rrotave gjatë frenimit dhe që në atë fluturim ishte jashtë funksionit.
Ekuipazhi ishte në dijeni të defektit, por pilotët nisën frenimin përpara se pesha e avionit të ishte transferuar plotësisht mbi rrotat. Në të njëjtën kohë, aktivizimi i “speedbrake”-ve, që ndihmojnë në uljen e shpejtësisë dhe rritjen e ngarkesës mbi trenin e uljes, u krye me vonesë.
Kjo bëri që rrotat të bllokoheshin, katër gomat të shpërthenin dhe disqet metalike të fërkoheshin drejtpërdrejt me asfaltin e pistës.
Hetuesit evidentuan si faktorë kontribues mungesën e trajnimit praktik për uljet me sistemin “anti-skid” të çaktivizuar, procedurat jo mjaftueshëm të qarta dhe vendimin për të çaktivizuar të dy kanalet e sistemit, megjithëse defekti ishte konstatuar vetëm në njërin prej tyre.
Pas përfundimit të hetimit, autoriteti italian i ka kërkuar kompanisë Boeing të përmirësojë procedurat e trajnimit dhe të mirëmbajtjes.
Ndërkohë, Ryanair ka ndryshuar rregullat e saj të operimit, duke shkurtuar afatin e lejueshëm për riparimin e defekteve në sistemin “anti-skid” dhe duke vendosur kontrolle shtesë për ekuipazhet përpara nisjes së fluturimeve.
