Ermal Beqiri, biznesmeni i shpallur në kërkim nga autoritetet shqiptare për dosjen e tenderave të AKSHI-t, është arrestuar në Francë, sipas raportimeve të mediave franceze.
Ai dyshohet se ishte piloti i një avioni të vogël civil që fluturoi në mënyrë të pazakontë mbi centralin bërthamor të Penly, në Normandi, duke zbritur nën lartësinë e lejuar për një zonë të ndjeshme.
Pas sinjalizimit, Forcat Ajrore dhe Hapësinore Franceze ndërhynë dhe e shoqëruan avionin drejt aeroportit të Albertit, ku piloti u arrestua nga policia.
Gjatë kontrollit fizik, autoritetet franceze raportohet se gjetën tre pajisje AirTag të fshehura në rrobat e tij. Ky element, së bashku me itinerarin e pazakontë të fluturimit dhe deklarimet e paqarta, ka ngritur dyshime te hetuesit francezë.
I ndaluari ka pretenduar se kishte gabuar lartësinë e fluturimit dhe se në momentin kur kaloi mbi centralin bërthamor po fliste në telefon me nënën e tij.
Sipas medias franceze “Le Journal du Dimanche”, autoritetet po verifikojnë edhe mundësinë që fluturimi të lidhej me veprimtari të tjera të paligjshme, ndërsa nuk përjashtohet as pista e spiunazhit.
Piloti është dënuar me procedurë të përshpejtuar me një gjobë prej 7 mijë eurosh për shkeljen e hapësirës së ndaluar ajrore. Më pas ai i është dorëzuar Zyrës Qendrore Franceze për Luftën kundër Krimit të Organizuar.
Raportimet franceze e identifikojnë të arrestuarin si “Ermal B.”, shtetas shqiptar i kërkuar nga autoritetet shqiptare. Të dhënat paraprake tregojnë se bëhet fjalë për Ermal Beqirin, por pritet ende një konfirmim zyrtar nga autoritetet shqiptare ose franceze.
Beqiri është shpallur në kërkim nga SPAK në kuadër të hetimeve për manipulimin e tenderave të Agjencisë Kombëtare të Shoqërisë së Informacionit. Ndaj tij është vendosur masa e sigurisë “arrest në burg”, ndërsa akuzohet për përfshirje në një grup të strukturuar kriminal dhe shkelje të procedurave të prokurimit publik.
Pas përfundimit të procedurave në Francë, pritet që autoritetet të shqyrtojnë ekstradimin e tij drejt Shqipërisë.
