Kompania ajrore amerikane Delta Air Lines po ndryshon gradualisht mënyrën se si trajton kabinat premium, duke zhvendosur fokusin nga përfitimet e besnikërisë tek shitja direkte e komoditetit.
Strategjia e re synon të rrisë të ardhurat dhe të reduktojë varësinë nga upgrade-et falas për pasagjerët elitë.
Për vite me radhë, klasa e parë në fluturimet e brendshme të kompanisë ishte shpesh e mbushur me pasagjerë që përfitonin upgrade falas.
Sipas modelit të ri, vendet premium po trajtohen gjithnjë e më shumë si produkte që shiten në treg, jo si shpërblime për besnikërinë.
Si pasojë, numri i upgrade-eve falas ka rënë, ndërsa rezervimet me pagesë janë rritur ndjeshëm.
Të dhënat tregojnë se kabinat premium gjenerojnë tashmë mbi 40% të të ardhurave nga pasagjerët, edhe në një kohë kur kërkesa për klasën ekonomike po zbutet.
Klasa e parë në fluturimet e brendshme, që dikur mbështetej kryesisht në upgrade, sot po mbushet kryesisht me pasagjerë që paguajnë. Produkti ndërkombëtar Premium Select po regjistron gjithashtu shitje të qëndrueshme dhe nuk mbetet më me vende bosh.
Në praktikë, kompania po ngushton diferencat e çmimeve mes klasave, po ofron komoditetin më herët në procesin e rezervimit dhe po lë më pak vende për upgrade në minutën e fundit.
Për pasagjerët e shpeshtë kjo do të thotë më pak privilegje falas, ndërsa për kompaninë një model më i qëndrueshëm financiarisht, me të ardhura më të parashikueshme. /skyweb.al
