Një studim i ri ka hedhur dritë mbi arsyen pse, në raste shumë të rralla, vaksina kundër COVID-19 e AstraZeneca është shoqëruar me tromboza. Sipas gjetjeve, fenomeni lidhet me një proteinë të adenovirusit të modifikuar që përdoret si vektor për të nxitur reagimin imunitar ndaj SARS-CoV-2.
Tek disa individë me predispozitë të veçantë gjenetike, kjo proteinë mund të nxisë prodhimin e antitrupave që, në vend se të synojnë virusin, lidhen me faktorin e mpiksjes së gjakut PF4. Ky ndërveprim mund të shkaktojë formimin e mpiksjeve dhe, njëkohësisht, ulje të trombociteve në gjak, duke rritur rrezikun për hemorragji.
Kjo gjendje e rrallë njihet si VITT (trombocitopeni trombotike imune e induktuar nga vaksina) dhe është vërejtur kryesisht tek gra nën moshën 50 vjeç gjatë fazës së parë të vaksinimit me këtë vaksinë.
Studiues nga Flinders University në Australi zbuluan se, në disa pacientë, qelizat B prodhojnë antitrupa me ngarkesë të lartë negative, të cilët tërhiqen nga PF4 me ngarkesë pozitive. Kjo krijon një reaksion zinxhir që çon në formimin e trombozave dhe konsumimin e trombociteve.
Megjithatë, ekspertët theksojnë se rastet janë jashtëzakonisht të rralla: në Evropë janë raportuar rreth 900 raste VITT nga mbi 3 miliardë doza të administruara globalisht. Autoritetet rregullatore kanë arritur në përfundimin se përfitimet e vaksinimit tejkalojnë ndjeshëm rreziqet e rralla.
Rezultatet e studimit janë publikuar në revistën shkencore The New England Journal of Medicine dhe konsiderohen të rëndësishme për zhvillimin e vaksinave të ardhshme që përdorin adenovirusin si vektor, një teknologji që ofron avantazhe në prodhim dhe ruajtje dhe që aplikohet edhe për sëmundje të tjera si tuberkulozi, Ebola dhe meningiti.
Kuptimi i këtij mekanizmi pritet të ndihmojë në rritjen e sigurisë së vaksinave të reja dhe në parandalimin e komplikacioneve të rralla trombotike. /skyweb.al
