Shqipëria ka nisur zyrtarisht zbatimin e nismës WiFi4WB, një projekt që parashikon vendosjen e pikave të internetit publik falas në 61 bashki të vendit, si pjesë e procesit të transformimit digjital dhe afrimit me standardet e Bashkimit Evropian.
Ceremonia e nisjes u zhvillua në Kalanë e Krujës, një prej destinacioneve më të vizituara kulturore në vend, duke simbolizuar lidhjen mes trashëgimisë dhe zhvillimit teknologjik. Projekti synon të zgjerojë aksesin në internet për qytetarët dhe vizitorët, duke e bërë lidhjen digjitale një shërbim të disponueshëm në hapësira publike në të gjithë territorin.
WiFi4WB është pjesë e iniciativës rajonale EU4Digital, e bashkëfinancuar nga Bashkimi Evropian dhe Qeveria Gjermane dhe e zbatuar nga GIZ. Programi synon pajisjen me WiFi publik falas të rreth 500 bashkive në Ballkanin Perëndimor, duke u integruar në planin më të gjerë për përshpejtimin e tranzicionit digjital dhe afrimin e rajonit me Tregun Unik Digjital të BE-së.
Pas përfundimit të zbatimit, qytetarët do të kenë akses në internet falas në sheshe, parqe, biblioteka, shkolla dhe site kulturore, duke lehtësuar përdorimin e shërbimeve digjitale, komunikimin dhe qasjen në informacion.
Ambasadori i Bashkimit Evropian theksoi se projekti synon më shumë sesa ofrimin e lidhjes me internetin, duke e cilësuar atë si një nismë që fuqizon komunitetet, mbështet zhvillimin lokal dhe përshpejton integrimin digjital të rajonit me tregun evropian.
