“Duart e zeza”, të cilave Edi Rama u ka faturuar dhunën e ditëve të fundit, tashmë kanë emra. Kryeministri drejtoi gishtin nga Rusia dhe Irani, duke i përfshirë në akuzat për ndikime të huaja pas protestave, krahas opozitës dhe grupeve ekstremiste.
Në komunikimin e mëngjesit të së dielës, Rama e vendosi veten në krye të një misioni për ta çuar Shqipërinë në Bashkimin Evropian. Sipas argumentit të tij, largimi nga pushteti do të ndërpriste negociatat dhe do ta kthente vendin vite prapa.
Kështu, përballë kërkesave për dorëheqje, kryeministri e paraqiti qëndrimin e tij dhe të Partisë Socialiste në qeveri si garanci për të ardhmen evropiane të Shqipërisë.
“Nuk është pushteti im këtu në lojë, është tryeza e negociatave në BE dhe shqiptarët duhet ta mendojnë shumë qartë: duan këtë apo duan BE-në?”, deklaroi Rama.
Ai i cilësoi kundërshtarët “të paaftë”, “mediokër” e “ziliqarë”, duke i akuzuar se nxisin dhunë sepse nuk e mundin dot me zgjedhje.
Argumenti i tij ishte se negociatat kanë një kalendar deri në vitin 2027 dhe se një ndryshim qeverie do të kërkonte kohë të gjatë për të rifilluar punën. “Nuk ndodh të dorëzohet shteti përpara kësaj, se nuk e merr veten me vite”, tha ai.
Në këtë mënyrë, Rama e lidhi fatin e negociatave me fatin e qeverisë së tij, duke e paraqitur kërkesën për largim si rrezik për procesin e integrimit.
Akuzave për ndërhyrje të huaja u shtoi edhe pretendimin se dy ditë më parë ishte neutralizuar një dron me eksploziv, që synonte të godiste Kryeministrinë dhe t’i vinte zjarrin oborrit të brendshëm. Sipas tij, një plan i tillë nuk mund të vinte nga studentët, por nga një “dorë e huaj”.
Rama deklaroi gjithashtu se kishte kërkuar vetëpërmbajtje për të shmangur atë që e quajti “kurthi i dhunës që kërkon gjak”, duke sjellë në vëmendje katër protestuesit e vrarë më 21 janar.
Mesazhi politik i këtij komunikimi ishte i qartë: Rama e paraqet veten si njeriun që duhet të qëndrojë në pushtet për të përfunduar misionin evropian, ndërsa përpjekjet për ta larguar i lidh me kundërshtarë të brendshëm dhe interesa të huaja.
