Kryeministri Edi Rama u bëri thirrje të rinjve të takohen me të për të diskutuar kërkesat e tyre, ndërsa paralajmëroi vijimin e ndërhyrjeve të RENEA-s dhe shtrëngimin e masave ndaj protestuesve të maskuar.
Në komunikimin e drejtpërdrejtë nga Kryeministria, Rama ofroi takime në zyrën e tij, në fakultete apo në forma të tjera, me ose pa praninë e kamerave.
“Ftoj këdo që do të bëjë dialog, këdo që do të më takojë, këdo që do të flasë me kamera, pa kamera, me fotografi, pa fotografi, në Kryeministri, në fakultet, çfarë doni, çfarë mund të bëjmë për ju”, deklaroi ai.
Ftesën e shoqëroi me një mesazh për vajzat dhe djemtë që protestojnë pa përdorur dhunë. Sipas tij, ata qëndrojnë pas personave me gurë e maska dhe më pas ankohen se janë lënduar nga policia.
“Aty nuk bëhet balet, as nuk luhet futboll”, tha Rama, duke mbrojtur praninë e forcave speciale në protestë.
“RENEA del sa herë që ka rrezik, patjetër doli dhe do dalë, do shtrëngohet rrethi ndaj atyre me maskë”, paralajmëroi kryeministri.
Rama e ndau qëndrimin e tij mes gatishmërisë për të biseduar me protestuesit pa maskë dhe përballjes me ata që, sipas tij, përdorin dhunën për t’i dërguar mesazh qeverisë.
“Kush do të flasë me mua pa maskë më ka këtu, kush do të më çojë mesazh me maskë mua dhe shtetin më ka përballë”, u shpreh ai.
Duke përsëritur se shteti nuk do të tërhiqet përballë dhunës, Rama deklaroi se kjo përballje do ta nxjerrë Shqipërinë më të fortë./skyweb.al
