Google po përballet me një padi të re kolektive në SHBA, e cila e akuzon kompaninë për aktivizimin në mënyrë të paligjshme të sistemit të inteligjencës artificiale Gemini brenda shërbimeve të saj kryesore të komunikimit, pa pëlqimin e përdoruesve.
Padia, e depozituar në gjykatën federale të San Joses në Kaliforni, pretendon se Google ka aktivizuar automatikishtGemini në Gmail, Google Chat dhe Google Meet që në tetor 2025, duke i lejuar sistemit të skanojë dhe analizojë mesazhet, bashkëngjitjet dhe përmbajtjen private të komunikimeve.
Sipas padisë, përdoruesit nuk janë njoftuar qartë, dhe çaktivizimi i funksionit kërkon navigim në disa nivele të cilësimeve të privatësisë, një proces që shumica nuk e kryejnë kurrë.
Në dokumentin e paraqitur në gjykatë thuhet se:
“Google ka shkelur ligjet për privatësinë dhe komunikimet elektronike duke aktivizuar në heshtje mjetin e inteligjencës artificiale që monitoron dhe proceson mesazhe private, pa pëlqim të informuar.”
Kompania ka pranuar se Gemini mund të përdoret për të “kuptuar kontekstin dhe të sugjerojë përgjigje”, por mbron qëndrimin se përdoruesit mund ta çaktivizojnë funksionin në cilësime.
Ndryshe nga vitet e mëparshme, kur përdoruesve u kërkohej që vetë të aktivizonin mjetet eksperimentale të inteligjencës artificiale, padia pretendon se këtë herë Google ka ndryshuar politikë duke e mbyllur mjetin default në funksion.
Rasti shton presionin mbi kompaninë, e cila është përballur më herët me akuza për mbledhje të dhënash pa leje nga shfletimi privat dhe historiku i lokacionit.
Nëse gjykata e pranon padinë, Google mund të përballet me një prej proceseve më serioze ligjore të lidhura me AI dhe privatësinë në Shtetet e Bashkuara.
