Agjencia Shtetërore e Kadastrës ka nisur punën në terren për evidentimin dhe trajtimin e objekteve pa dokumentacion pronësie në zonën e Spitallës, në Durrës.
Deri më 2 tetor, ekipet e Drejtorisë Vendore të ASHK-së “Durrës-Krujë-Kavajë” do të kryejnë verifikime në këtë zonë.
Procesi do të përfshijë banesat për të cilat janë paraqitur më parë kërkesa pranë Kadastrës. Por verifikimi nuk do të kufizohet vetëm te dosjet ekzistuese.
Sipas njoftimit, ekipet do të evidentojnë edhe objektet për të cilat pronarët apo poseduesit nuk kanë bërë më parë aplikim.
Këto banesa mund të përfshihen në proces vetëm nëse plotësojnë kriteret e përcaktuara nga legjislacioni në fuqi. Kadastra u ka kërkuar banorëve të Spitallës që të bashkëpunojnë me ekipet gjatë kontrolleve në terren.
Qytetarët duhet të mundësojnë hyrjen e specialistëve për kryerjen e matjeve të banesave.
Ata duhet të vendosin gjithashtu në dispozicion informacionin dhe dokumentacionin që zotërojnë për objektin. Verifikimi në terren synon të përcaktojë situatën faktike dhe juridike të banesave pa dokumente.
Evidentimi nuk nënkupton automatikisht pajisjen me dokument pronësie, pasi çdo objekt do të vlerësohet sipas kritereve ligjore.
Banorët e zonës kanë afat deri më 2 tetor për të bashkëpunuar me grupet e Kadastrës që do të ndodhen në terren. /skyweb.al
