Mohamed Alabbar mbërriti në Shqipëri i shoqëruar nga pritshmëri të larta dhe promovim i gjerë publik. Kryeministri Edi Rama e prezantoi si sipërmarrësin që kishte ndërtuar “Burj Khalifa” dhe si investitorin që do t’i jepte një pamje të re Portit të Durrësit përmes një projekti ambicioz.
Megjithatë, ecuria e projektit nuk ka përmbushur pritshmëritë e krijuara në fillim. Investimi i paralajmëruar prej rreth 2 miliardë dollarësh mbetet ende larg fazës së plotë të realizimit, ndërsa së fundmi autoritetet konfirmuan se dy ndërtesa të ngritura në kantier kishin pësuar fundosje.
Së fundmi, edhe vetë Alabbar ka pranuar se në zhvillimin e projektit në Shqipëri janë bërë gabime. Në një intervistë, themeluesi i kompanisë “Emaar” u shpreh se “në Shqipëri ndërtova shumë shpejt” dhe se, sipas tij, “kjo ishte një gabim”.
Biznesmeni iu referua edhe një investimi tjetër të tij në bregdetin e Malit të Zi, të cilin e konsideroi gjithashtu një vendim të gabuar. Sipas Alabbar, mënyra e procedimit u ndikua nga këshillat e një juristi indian, të cilat, sipas tij, rezultuan të pasakta.
Deklaratat e Alabbar vijnë në një kohë kur projekti i Portit të Durrësit vijon të jetë objekt debatesh dhe kritikash lidhur me ritmin e punimeve, kostot e investimit dhe problematikat e raportuara gjatë zbatimit të tij.
