Industria globale e mishit ka zbuluar një burim të ri fitimesh, duke shndërruar pothuajse çdo pjesë të lopëve në produkte për shëndetin, bukurinë dhe ushqimin.
Nga lëkura dhe kockat te kërci, tendinat dhe dhjami, gjithnjë e më shumë pjesë të kafshëve që nuk përfundojnë në pjatat e konsumatorëve po përdoren për prodhimin e kolagjenit, suplementeve ushqimore dhe kozmetikës.
Sipas një investigimi të Financial Times, kjo industri po përjeton një bum të vërtetë, e nxitur nga kërkesa në rritje për produkte natyrale me origjinë shtazore.
Një nga shembujt më të pazakontë është dhjami që merret nga zona përreth veshkave të gjedhëve, i cili përpunohet dhe shitet si krem hidratues për lëkurën.
Ndërkohë, kulloshtra, qumështi i parë që prodhon lopa pas pjelljes, po tregtohet në formë pluhuri si suplement për personat që frekuentojnë palestrat, për shkak të përmbajtjes së proteinave, vitaminave dhe mineraleve.
Në rrjetet sociale, ndikues të fushës së shëndetit dhe bukurisë po promovojnë këto produkte si alternativa natyrale ndaj përbërësve sintetikë, duke u atribuuar përfitime për lëkurën dhe tretjen.
Vetëm në Shtetet e Bashkuara, shitjet e suplementeve me kolagjen u rritën me 20% në sasi gjatë vitit deri më 24 tetor 2026, ndërsa vlera e tregut arriti në 1.3 miliardë dollarë, sipas kompanisë së të dhënave NIQ.
Në shkallë globale, tregu i kolagjenit me origjinë nga gjedhët arriti rreth 4.4 miliardë dollarë gjatë vitit 2025.
Kompanitë e mëdha të përpunimit të mishit, si gjiganti brazilian JBS dhe kompania amerikane Darling Ingredients, po investojnë për të përfituar nga kjo kërkesë.
JBS, kompania më e madhe në botë e përpunimit të mishit, ka investuar rreth 73 milionë dollarë në një fabrikë në Brazil që përdor lëkurën e gjedhëve për prodhimin e kolagjenit dhe xhelatinës.
Produktet e saj tashmë përdoren në pije proteinike, kremra djathi dhe madje edhe në birrë pa alkool.
Kompania po zhvillon gjithashtu ushqime të lehta me përmbajtje të lartë proteinash, karamele me kolagjen dhe pije të gatshme për konsum.
Nga ana tjetër, Darling Ingredients kontrollon rreth 30% të prodhimit botëror të kolagjenit dhe xhelatinës.
Divizioni i saj i përbërësve ushqimorë regjistroi 263 milionë dollarë fitime operative të përshtatura, para interesave, taksave dhe amortizimit, gjatë nëntë muajve të parë të vitit 2026, me një rritje prej 24%.
Përfaqësuesit e kompanisë shpjegojnë se rreth gjysma e një kafshe nuk përfundon në pjatën e konsumatorit, çka krijon mundësi të mëdha ekonomike për shfrytëzimin e pjesëve të tjera.
Kërkesa po rritet edhe në Kinë, ndërsa prodhuesit e ushqimeve po shqyrtojnë përdorimin e kolagjenit si alternativë ndaj proteinave më të shtrenjta të hirrës së qumështit.
Fenomeni ka marrë emrin “Cowmaxxing”, një term që përshkruan përpjekjen e industrisë për të nxjerrë vlerën maksimale ekonomike nga çdo pjesë e gjedhit.
Për kompanitë e mishit, kjo do të thotë se fitimi nuk vjen më vetëm nga shitja e biftekëve apo produkteve të tjera ushqimore, por edhe nga lëndët e para që dikur kishin vlerë shumë më të ulët.
Rritja e industrisë së suplementeve dhe kozmetikës po e kthen kështu përpunimin e nënprodukteve shtazore në një biznes gjithnjë e më fitimprurës.
Megjithatë, popullariteti i këtyre produkteve dhe pretendimet e marketingut për përfitimet e tyre shëndetësore nuk nënkuptojnë se të gjitha këto efekte janë provuar shkencërisht.
