Shqipëria mund të pajiset me një nga sistemet më të fuqishme të artilerisë raketore amerikane, HIMARS, të cilat u bënë të njohura në mbarë botën për goditjet shkatërruese ndaj bazave dhe depove të municioneve të ushtrisë ruse gjatë luftës në Ukrainë.
Departamenti Amerikan i Shtetit ka miratuar shitjen e mundshme të dy sistemeve M142 HIMARS për Shqipërinë, si pjesë e një pakete ushtarake me vlerë të përllogaritur prej 210 milionë dollarësh.
Sipas Defence Mirror, vendimi është marrë më 17 nëntor dhe i hap rrugën një marrëveshjeje që do të rriste ndjeshëm kapacitetet goditëse të Forcave të Armatosura shqiptare.

HIMARS është një sistem raketor amerikan me lëvizshmëri të lartë, i aftë të godasë objektiva me saktësi në distanca dhjetëra kilometrash, përpara se të ndryshojë pozicion për t’iu shmangur kundërpërgjigjes së kundërshtarit.

Këto sisteme fituan famë botërore në verën e vitit 2022, kur ushtria ukrainase nisi t’i përdorte kundër depove të municioneve, qendrave komanduese dhe linjave të furnizimit të forcave ruse.
Goditjet me HIMARS dëmtuan rëndë logjistikën ruse dhe e detyruan Moskën të zhvendoste një pjesë të depove të municioneve më larg vijës së frontit, duke vështirësuar furnizimin e njësive luftarake.
Në korrik 2022, Ukraina deklaroi se kishte shkatërruar 50 depo municionesh ruse me këto sisteme, megjithëse shifra nuk u verifikua në mënyrë të pavarur nga Reuters.
Paketa e kërkuar nga Shqipëria përfshin dy lëshues HIMARS, gjashtë kontejnerë me raketa të drejtuara M31A2 dhe gjashtë kontejnerë me raketa M30A2, të pajisura me koka luftarake alternative.
Në total, bëhet fjalë për 72 raketa, si dhe sisteme të drejtimit të zjarrit, automjete ushtarake Humvee, pajisje komunikimi dhe mbështetje teknike.

Kontraktori kryesor i parashikuar është gjiganti amerikan i industrisë ushtarake Lockheed Martin, ndërsa paketa përfshin edhe trajnimin e personelit shqiptar për përdorimin dhe mirëmbajtjen e sistemeve.
Sipas autoriteteve amerikane, pajisja e Shqipërisë me HIMARS do të përmirësonte aftësinë e vendit për t’iu përgjigjur kërcënimeve të mundshme dhe për të kontribuar në planet mbrojtëse të NATO-s.
Megjithatë, miratimi i Departamentit të Shtetit përbën vetëm një hap të rëndësishëm në proces. Marrëveshja përfundimtare e blerjes dhe afatet e dorëzimit nuk janë konfirmuar ende.
















