Kryeministri Edi Rama u ka kërkuar rrjeteve të supermarketeve dhe furnitorëve më shumë transparencë në përcaktimin e çmimeve, duke paralajmëruar se fitimet nuk duhet të rëndojnë në mënyrë të padrejtë mbi konsumatorët.
Gjatë takimit për platformën digjitale “Pasqyra e Çmimeve”, Rama deklaroi se qeveria nuk synon të vendosë çmimet dhe as të kufizojë fitimin e bizneseve.
Sipas tij, objektivi është që qytetarët të informohen dhe të kenë mundësi të zgjedhin supermarketin ku produktet ofrohen më lirë.
“Fitoni, por lini të tjerët të marrin frymë”, u shpreh Rama, duke shtuar se sipërmarrjeve nuk po u kërkohet të heqin dorë nga fitimi apo të shndërrohen në organizata bamirësie.
Platforma do të mundësojë krahasimin e çmimeve të produkteve të njëjta në pika të ndryshme shitjeje.
Për këtë arsye, supermarketet duhet të publikojnë të dhëna të plota për çdo produkt, duke përfshirë barkodin, markën, gramaturën dhe njësinë matëse.
Kryeministri kërkoi që sistemi të bëjë dallimin e qartë ndërmjet çmimit të zakonshëm dhe çmimit promocional, ndërsa të dhënat duhet të përditësohen sipas një standardi të përbashkët.
Platforma duhet të tregojë gjithashtu kur një produkt nuk gjendet në stok, në mënyrë që krahasimi të mos mbetet vetëm formal, por të jetë praktik për konsumatorët.
Rama kërkoi edhe publikimin e listës së pikave të shitjes dhe adresave që do të përfshihen në fazën pilot të projektit.
Nëpërmjet “Pasqyrës së Çmimeve”, qytetarët pritet të kontrollojnë dhe krahasojnë ofertat e supermarketeve përpara se të vendosin se ku do të blejnë. /skyweb.al
